Well, that was just a lie

Sa di pa ko moadto sa eskol inig kabuntag, moduaw una ko kang Jude sa ospital. Mao sab ni ang akong buhaton inig kahapon, sa di pa ko mopauli mohapit una ko sa ospital aron makig-estorya kang Jude. Matod nila ni Mama ug Papa, ug sa mga ginikanan ni Jude, magul-anon si Jude kanunay. Apan kon ako ang iyang ikasulti, malipayon kaayo siya.

“Misugot na sila si Papa ug Mama, Susette.”

Morag way kabutangan sa kaugalingon ni Jude ang gibati niyang kalipay usa ka hapon nga miduaw ko niya sa ospital. Lagsik na siya ug naulian na sa kabaskog.

“Misugot? Bahin sa unsa, Jude?”

Pahiyom lang ang gitubag ni Jude nako.

Nanglabay ang mga adlaw. Usa ka Domingo sa buntag, nagkinataw-anay mi si Jude nga nagdinaganay sa baybayon ubos sa among resthouse. Kagabii pa ming nahiabot gikan sa siyudad. Nagginukdanay mi. Unya nagdungan mi pag-ambak sa tin-aw nga tubig sa dagat. Nagsinabligay mi sa tubig-dagat. Mora mig mga bata nga kalipay ra ang gihunahuna.

Misawom ko. Giagpas ko ni Jude sa ilawom sa dagat. Iya kong naapsan.

Nagkuptanay mi sa kamot nga mihaw-as sa dagat. Nagtupad mig yaka sa balas. Naglantaw mi sa mga mananagat sa lawod.

“Diyos na ang mosabot, Susette.”

“Makasabot ang Diyos, Jude.”

“Tinuod gyud ang giingon nga daghan ang gitawag pero pipila lamang ang milampos.”

Misandig ko sa dughan ni Jude. Gigakos ko niya. Unya naghinagkanay mi sa lips. Dugay-dugay gyud. Kanindot sa paminaw ko sa akong kaugalingon niadtong tungora. Kanindot diay aning mobati tag true love.

“You know, nakauyab ko samtang didto ka sa seminaryo.” Mitug-an ko kang jude dihang wa na mi maghawok. “Pero dali ra, nakigbuwag dayon ko nila. Nasuta ko man gud nga wa diay koy love nila. Ikaw ang akong tinuod nga gimahal, Jude.”

Gipislit ko ang lamurok nga aping ni Jude. Bag-o ko lang siyang gisugot. “Nagtuo baya ko nga wa kay

love nako, Susette, kay kanunay man ko nimong balibaran ug kataw-an kon maghisgot na ko sa akong love nimo.” “Jokes ra to, uy. Just a lie.” Unya, namalik mi si Jude sa resthouse diin naghuwat sila si Mama ug Papa, ug ang mga ginikanan ni Jude.

(KATAPUSAN)