McGregor hugaw nga moaway?

Giakusahan ni Floyd Mayweather Jr. si Conor McGregor nga migamit og “hugaw nga away” sa training niini alang sa umaabot nilang panagsangka karong Agusto 26 sa Las Vegas, USA.

Sa usa ka conference call, nagkanayon si Mayweather nga aduna siya’y katahap nga illegal nga mga kumo ang gipangbuhian ni McGregor sa sparring sessions niiini.

Nagkanayon si Mayweather nga sa footage sa sparring nila ni McGregor batok kang Paulie Malignaggi, aduna siya’y mga nakita nga illegal nga mga sukmag gikan sa mixed martial arts (MMA) superstar.

Makita sa footage nga daw iyang gipatikangkang si Malignaggi. Si Mayweather, 40, wala mibilib.

“I had a chance to see it and my thought was, it was interesting,” asoy ni Mayweather kabahin sa pagtumba ni McGregor kang Malignaggi. “A lot of rabbit punching, a lot of illegal shots, behind the head.”

Si McGregor mi-hire sa beteranong boxing referee nga si Joe Cortez sa iyang training camp aron matambangan siya niini sa mga balaod sa boksing.

“He’s had Joe Cortez in his training camp and I’ve still seen him being extremely dirty,” dugang ni Mayweather.

Nagkanayon si Mayweather nga sa ilang away ni McGregor, importante kaayo ang trabaho sa usa ka referee.