■ GOLD MEDAL.
Milampos sa paglangkat sa unang gold sa Pilipinas
Makita sa nawong nga di matukib ang kalipay ni Cebuana marathoner Mary Joy Tabal human niya makuha ang gold medal, labing una sa Pilipinas ning nagsugod nga 2017 Southeast Asian Games nga gipahigayon sa Malaysia. Tam-is kini kaniya kay hapit wa siya makaapil human siya wa unta dawata sa Philippine Athletics Track and Field Association (PATAFA), apan nahilot ra kini.
Katumanan sa damgo ug tinguha maoy misugat sa Sugboanong marathoner ug Olympian Mary Joy Tabal human niya masungkit ang unang gold medal sa Pilipinas atol sa pormal nga pagsugod sa 29th Southeast Asian (SEA) Games didto sa Kuala Lumpur, Malaysia.
Ang lumad nga taga Barangay Guba, dakbayan sa Sugbo, mitapos sa 42-kilometro nga panagtigi sulod sa duha ka oras, 48 minutos ug 26 segundos aron dominahon ang
women’s class didto sa Bukit Jalil National Stadium.
Nagsunod kaniya ang Vietnamese nga si Thi Than nga mitabok sa finish line sa oras nga 2:55:43 ug ikatulo ang Thailander nga si Natthaya T. nga may oras nga 2:58:17.
Ang kadaugan sa 28-anyos nga Tabal maoy bunga sa iyang subsob ug seryuso nga training sulod sa tulo ka buwan didto sa Tuscany Training Camp sa Italy nga gipaluyohan sa Motor Ace Kawasaki Racing Team. Iyang napalabwan ang iyang silver medal finish sa 2015 SEA Games sa Singapore diin mi oras siya og 3:04:39. Hangtod ning pagsuwat kagahapon sa buntag, ang Philippines mitali og usa ka gold, usa ka silver ug duha ka bronze.
Ang kalampusan nga naangkon ni Joy maoy nagpamatuod sa dakong kasaypanan sa iyang kritiko.
“I congratulate Joy (Tabal), her trainer Philip Duenas and Junnel Borromeo of Motor Ace
Kawasaki for the victory,” matod ni Fernandez sa dihang gikahinabi sa Sun.Star Superbalita kagahapon sa telephone interview.
Gipasalamatan usab ni Fernandez ang dakbayan sa Sugbo, ang Probinsiya ug ingon man si Congresswoman Gwen Garcia kinsa hugot usab mipaluyo nga malakip si Tabal sa lineup alang sa SEA Games.
Si Tabal gikatakda nga moabot dinhi sa Sugbo ugmang adlawa.