ENFORCER ‘SIGE OG PANGILKIL’

GITAKTAK NI MAYOR OSMEÑA; WA NA KATRABAHO SUGOD KAGAHAPON

Gitaktak ni Cebu City Mayor Tomas Osmeña ang usa ka traffic enforcer, kinsa gireklamo nga nangilkil sa mga motorista nga iyang madakpan gumikan sa traffic violation.

Si Francisco Ouano, operations head sa City Traffic Operation Management (Citom) nagkanayon nga nakadawat siya og tulo ka mga reklamo bahin sa enforcer nga giingong nangilkil.

Gipugngan una sa Superbalita Cebu ang iyang ngan samtang wa pa makuhai sa iyang habig.

Gitug-an ni Ouano nga aduna pay higayon nga mangalyas ang enforcer og laing ngan aron di siya mailhan ug mosakmit usab og lisensiya sa mga drayber.

Ilawom sa balaod, ang mga traffic enforcers sa local government unit di maka- confiscate og driver’s license sanglit eksklusibo sa mga organic personnel sa Land Transportation Office ug kadtong mga regular employee sa gobiyerno, kinsa ilang gi- deputized. “Kasagaran pandakpon niya unya iyang i- negotiate nga siya na lang ang mobayad didto sa Citom office. Usahay ingnon niya nga kon maisyohan og temporary operators permit (TOP), P12,000 ang bayran. Kon citation lang, P1,000 ra human naa sad siyay modus nga kuhaon ang license,” paghulagway ni Ouano.

Sugod kagahapon, wa na siya patrabahoa human iyang nadawat ang dismissal order nga gipirmahan ni Osmeña nga epektibo niadtong Biyernes.

Ang mao nga enforcer nasulod niadtong Agusto sa miaging tuig.

Naa siya ma- assign sa Salinas Drive sa Lahug.

“Bati kaayo ang iyang gibuhat kay maapektohan ang iyang mga kauban nga nagtinarong sa ilang pagtrabaho nga nilanat na og 15 ngadto sa 20 ka tuig sa serbisyo,” matod ni Ouano. UPAT GI-MONITOR

Gipadayag ni Ouano nga adunay laing upat ka mga traffic enforcer nga ila karong gipanid-an gumikan gihapon sa pagpangilkil sa mga drayber nga ilang madakpan.

Gihulagway niya nga nagpadayon ang ilang imbestigasyon ug kon makumpleto na ang ilang pakisusi, hayan ang upat ka enforcers mosunod sa gidangatan sa una nilang kauban.

Matod ni Ouano nga tulo na ka mga traffic enforcer ang nataktak sa Citom.

Ang usa adunay kaso sa pagpangilkil ug ang ikaduha nasakpan nga nisuyop og shabu sa drug den.