PVO NAGBANTAY USAB SA UBANG SAKIT SA MANOK
Gawas sa avian flu, ang Provincial Veterinary Office hugot usab nag- monitor sa ubang mga sakit nga makamatay sa mga manok sa lalawigan sa Sugbo.
Si Dr. Mary Rose Vincoy, pangulo sa PVO, nibutyag nga nakadawat sila og report nga dunay nangamatay nga mga manok sa upat ka mga lungsod sa lalawigan.
Naglakip kini sa San Remigio, Compostela, Barili ug Minglanilla.
Apan dali niya giklaro nga dili kini gumikan sa avian influenza nga sama sa nahitabo sa probinsya sa Pampanga.
Matod niya base sa gihimo nga pakisusi sa ilang buhatan bacterial infection ug dili maayo nga pagdumala sa mga poultry farm diin ang uban kuwang og tubig ang hinungdan nga nangasakit ang mga manok ug nangamatay.
Ningpakatap na usab sila og mga veterinarian sa 16 ka subports sa lalawigan diin gihatagan nila og prayoridad ang mga pantalan diin modunggo ang mga barko nga gikan sa Luzon sama sa Pulangbato sa siyudad sa Bogo ug Hagnaya sa San Remigio.
Si Vincoy niingon mahinungdanon nga dunay mobantay nga veterinarian sa mga pantalan tungod kay kon deputized kini sa Bureau of Animal Industry, kini ang moisyu og animal health certificate sa dili pa isyuhan og shipping permit sa quarantine officer ang karne nga ibiyahe sa laing lugar, pagmatuod nga luwas kini kaunon ug sa sakit.
Gihimo nila kini aron way makasulod nga mga manok ug ubang poultry products nga gikan sa Luzon.
“We need to protect the industry and protect our people,” dugang ni Vincoy.
Niadtong Huwebes, gitigom sa PVO ang mga beterinaryo nga nagtrabaho sa gobiyerno ug pribadong sektor aron i- update sa gihimo nga mga lakang sa kagamhanan pagpugong nga mokatap ang avian influenza nga hinungdan sa pagkamatay sa liboan ka mga manok didto sa Pampanga.
Si Bantayan Mayor Ian Christopher Escario nibutyag nga apil sa ilang plano nga buhaton aron dili mokatap ang avian influenza sa ilang lungsod mao ang pagpa- spray sa ligid sa mga trak sa dili pa mosulod sa ilang lugar ug ang pagpaagi sa mga bisita sa foot path nga dunay disinfectant
“But unta kon naay preventive measures ang province didto pa lang daan sa Hagnaya or diri sa terminal sa Ceres,” dugang sa mayor.
Si Vincoy nidugang nga i- activate usab nila ang Avian Influenza Task Force nga pangulohan ni Gob. Hilario Davide III nga langkoban sa lainlaing mga departamento sa Kapitolyo aron maseguro nga makontrolar ang pagsulod sa sakit dinhi sa Sugbo.
Siya nipaneguro nga luwas gihapon ang pagkaon sa karne sa manok dinhi sa Sugbo.
Si Agriculture Assistant Secretary Enrico Garzon niluwat og memorandum circular nga nagmando sa pag-ban sa pagsulod sa mga karne sa manok ug ubang poultry products gikan sa Luzon paingon sa Visayas ug Mindanao.