MAKAHILAK KA GYUD OG KINATAWA
Kon gusto ka makalimot sa imong mga problema, utang ug way ayo nga uyab, tan-aw og sine. Wa ko niingon nga kon motan-aw kag salida, masulbad na ning mga problemaha. Lisod kaha ni sila sulbaron ilabi na kon imong nawong ang imong problema.
Ayaw pag- expect nga human nimog tan-aw sa salida, mabayran na nimo imong utang, mabuotan og kalit imong uyab ug mosamot ka ka-gwapo/gwapa. Sayop na! Wa pa gyud na mahitabo sa kasaysayan sa mga salida. Naay gahumgahum ang sinehan apan di alang niana.
Ang akong buot gipasabot nga kon motan-aw kag sine, una, mopalit gyud kag ticket inig human na ang popcorn. Ayaw unaha ang popcorn kay basin mahutdan kag ticket. Char lang.
Bitaw, niadtong Miyerkules niabli ang Pista ng Pelikulang Pilipino diin 12 ka mga lokal nga lilas ang gipasalida sa mga sinehan.
Usa na niini ang “Patay na si Hesus” nga salida sa Sugnako director nga si Victor Villanueva.
Nitan-aw ko ani uban sa akong mga higala sa kolehiyo nga sila si Rose Ann ug Te Era.
Makapangutana siguro mo nganong ang “Patay na si Hesus” ang among gitan-aw nga may uban pa mang mga salida nga star-studded sa mga sikat nga artista sa kauluhan.
Di ko bitter ha apan kapoy na kaayo sigeg tan-aw anang mga love-love ug char-char nga mga istorya oy. Way bag-o?
Gawas niana, presko alang ang pagkahimo sa salida ni Villanueva tungod kay sagad sa mga artista ug nagpaluyo sab niini mga Sugbuanon. Dinhi usab sa Sugbo gi- shooting ang salida. So, kahibaw na ming daan nga makatawa mi sa maong salida, ang wa namo napangandami nga pabahakhakon man diay mi ani.
Di nimo mabantayan nga sa imong pagbahakhak, makaluha na ka slight, di pud kanang heavy.
One time, nakabantay si Rose Ann nako nga nihikap kos akong mata, nangutana siya kon nihilak ba ko? Sa tinuod lang, wa sad ko mahibaw kon ang akong gitrapuhan luha o muta ba lang ba gyud to.
Natural ang pagka-alegre sa salida nga sinulat ni Fatrick Tabada, di pinugos, ang nakanindot ini, base sa maong kasinatian ang “gaan” ang vibes ini.
Bisaya ang sinultian sa salida nga adunay sagol Tagalog, di siya pambrayt nga Iningles. Ug sa tibuok salida, maka- relate gyud ka isip Bisdak sa mga “piste,” “yawa,” “animal,” “CHAR” ug uban pa.
Simple apan makapangbuanong hunahuna ka sa dagan sa istorya niini, pangbrayt gamay apan kanang makasabot gani ka? Di sad ni pangbugo ha. Kon kasabot kas akong buot pasabot, mao na na.
Bilib kaayo ko sa pag-arte ni Jaclyn Jose, kinsa niduwa sa papel ni Iyay, ang inahan sa iyang upat ka mga anak nga sila Judith Marie (Chai Fonacier), Bert (Vincent Viado) ug Jay (Melde Montañez).
Wa sab ko magtuo nga aduna usay ikabuga ang Sugbuanong mga artista nga niduwa sa papel nga mga anak ni Jose. Maayo pagkapili sa cast, aprub!
Actually, human sa salida, daghan kaayo mig nahisgutan sa matag eksena niini, di pang char-char apan nadala gyud mi. As in! Laliman kag balig usa ka salidahan sad among chika?
Kon ako pang-isaysay dinhi tanan nakong nakit-an, gilud-an, gikataw-an ug gihilakan, unsa naman lay mahabilin alang ninyo? Maong tan-aw nalang mo, aron mangatawa sab mo!
Nisuwat ko sa akong kasinatian di lang tungod kay dako akong pagdayeg sa salida apan gusto ko makakita og daghan pang mga salida sama sa “Patay na si Hesus” nga ato, orihinal ug nipakita kon unsa ta, atong tinuohan ug kultura.
Ang Pista ng Pelikulang Pilipino hangtod nalang karong Agusto 22 maong giawhag ko kamo sa pagtan-aw sa ilang mga salida.
Sa pagtapos, lisod mopakatawa og tawo, mas lisod sab pakataw-on ang mga brayt apan nahimo nis “Patay ni si Hesus.” Ang pinakalisod ang pinugos nga katawa kay maka-utot gyud ka, basin nahimo nis ubang salida. Laysho! /