Anti-poor nga buhis
Apa sumpay kini niadtong atong lindog sa miaging Huwebes kabahin niining plano nga pagbuhis o pagpatong og excise tax sa mga sweetened beverage products nga maoy sagad natong gi-konsumo. Kining maong mga produkto gi-konsiderar nato nga
prime commodities kay kada adlaw nato kining gi-inom sama sa kape, softdrinks, juice
drinks ug energy drinks. Ubos sa House
Bill No. 292, kining maong mga produkto buhisan og P10 ug 4 per cent matag tuig kon pananglitan mapasar man kining maong balaudnon. Ang makuha nga buhis adto gamiton sa mga proyekto sa gobiyerno sama sa edukasyon ug panglawas. Dili man kita mosupak kabahin sa taxation pero tan-awon usab unta sa atong mga magbabalaod kon asa mangita og pamaagi nga makakuha sila og buhis nga dili maapektuhan ang katawhan labi pa ang mga kabus. Ang mga kabus maoy magbaguod.
Ang Philippine Association of Stores and Carinderia (Pasco) ug ang kahugpungan sa mga sugar planters mi-awhag kang Pres. Rodrigo Duterte nga dili una sertipikahan nga urgent o dinalian ang maong balaodnon. Gusto ning maong mga kahugpungan nga adunay konsultasyon ug hearings nga ipahigayon sa dili pa kini debatihan sa plenarya. Nagpahigayon na og signature campaign ang maong grupo aron makahakot og igong pirma ug ila kining i-presentar sa Kongreso ug sa Office of the President nga nagpadayag sa ilang kusganong pagsupak niini. Sa mga
urban cities, gibana-bana nga adunay mokabat nga 1.5 ka milyon ka mga sari-sari stores ug carinderia.
Gusto sa maong mga kahugpungan nga estudyuhan kini og maayo kay daghan ang maapektuhan niini. Matod nila nga okey lang ang excise tax sa sigarilyo ug sa ilimnon nga makahubog kay kanang mga mga produkto para man lang lingaw-lingaw o pleasure ug makadaot pa gyud sa lawas. Apan kining maong mga produkto kanunay gi- patronize o gikonsumo sa consuming public. Asa man ihapak sa mga manufacturers ug producers ang buhis nga makuha gikan kanila? Natural adto sa mga konsumidor. Maki-angayon ba kini? Anti-poor ni.
(bobbygnalzaro@gmail.com)