Tumana lang una
Sa usa ka press conference, si Enrio “Rico” Dionson, tagiya sa Rico’s Lechon, nibutyag nga personal ang rason nganong gipasirhan ni Mayor Tomas Osmeña. Iyang gibutyag nga nahitabo kini sukad nila gipahibawo si Bea Villegas-Osmena, umagad sa mayor, nga di na nila kini una isusyo sa negusyo kay magkinaugalingon lang una sila.
Si Bea, duna kunoy 30 porsyento nga share sa ilang negusyo nga Rico’s Lechon sa Mabolo sukad niadtong 2012. Lima ka tuig ang kontrata ug natapos kini niadtong Hulyo 31.
Apan nitubag ang kampo sa mga Osmeña. Niadto pa diay nga Pebrero ning tuiga ang mga Dionson gipahinumdoman ni Bea nga atimanon ang business permit.
Niadtong Biyernes sa buntag, ang ilang ihawan ug aslanan gipasirhan ni Osmeña.
Kon tinuod man ang gisulti ni Dionson nga personal, makita usab nga duna silay kakuwangan. Wa silay business permit nga gikinahanglan sa pag- operate sa usa ka negusyo, labina sa kadako sa Rico’s Lechon.
Apan makapahibung usab kon nganong karon ra kini gihimo sa mayor nga taudtaud na man diay nga way klarong business permit ang mao nga establisemento.
Ang mas labing maayong buhaton ni Dionson mao ang pagpakahilom lang una, inay nga magsige siya og tabi nga mopasamot na hinuon sa ilang sitwasyon.
Ikaduha, ilang hikayon ang tanang mga papelis nga gikinahanglan aron mahatagan sila og mayor’s business permit.
Kon ilang matuman ang tanang gikinahanglan, apan di lang gihapon sila hatagan, kana maoy lain na sab nga estorya. Klaro na hinuon nga gigukod ug gidumtan sila. Maklaro na nga personal ang tumong sa mayor sa pagpasirado.
Diha, makahimo na usab sila og legal nga lakang nga nahasubay sa balaud.
Sa pagkakaron, mas maayong motak-om ug lihok ang pasultihon.