Pebrero pa gi-follow up

Nasuko si Mayor Tomas Osmeña sa gipalakaw karon nga istorya nga ang Rico’s Lechon gipasirad-an tungod sa panagbangi sa negusyo.

Tinuod nga kasosyo sa pamilyang Dionson ang asawa ni Miguel, bugtong anak ni Mayor Osmeña, nga si Bea Villegas Osmeña sa Rico’s Lechon nga Mabolo branch.

Matod pa sa mga Dionson atol sa usa ka press conference, naabot ang mga warning kabahin sa business permit sa Rico’s Lechon karon nang Hulyo human ilang giingnan si Bea nga gusto sa pamilya nga sila na lang ang modala sa negusyo.

Buot ipasabot, naukay lang kuno ang kawalay business

permit karon na nga ilang giingnan si Bea nga wa na kiniy labot sa Rico’s Lechon.

Daghan dayon ang nituo sa maong istorya.

Apan nasukwahi kini sa gipaguwang pruweba sa mga Osmeña. Simple ra kaayo ang pag- post sa mga screenshot sa chat nilang Bea ug mga anak ni Rico.

Ang mga kaatbang sa mayor di mohisgot nga Pebrero 2 pa diay nagsugod sa pag- follow up si Bea kabahin sa business permit. Nabalaka siya sa pag-istrikto unya sa City Hall. Nabalaka siya kay lima ka tuig na nga way business

permit ang Rico’s Lechon sa Mabolo.

Kay partner ra man siya sa Mabolo nga outlet sa Rico’s, wa siyay kalabotan nga wa sab diay business permit ang Rico’s Lechon diha sa dalan Escario. Samot nga wa siyay kalabotan nga wa sab diay business permit ang ilang ihawan diha sa Talamban.

Basi sa mga chat, wa man kitay nabantayan nga naglain ang buot sa mga Dionson ug ni Bea. Apan naa ang pagpakabana ni Bea sa kahimtang sa business permit sa establisemento.

Alang kanako, kadakong sayop nga nagpa- presscon pa.

Basi sa mga impormasyon nga atong nahipos, nagpadala si Rico sa galgal sa mga kaatbang sa mayor mao nga nipaguwa siya niining maong istorya.

Sa pagkakaron, mahimo na ang Rico’s Lechon nga sampol sa plano ni Mayor Osmeña nga pasirad-an ang mga mopalusot kabahin sa business permit.

Sa pagkakaron, makaingon gyud ang Syudad sa Sugbo nga way pagdapigdapig ang mayor. Rico’s makabangon? Bisan pa man og maglisod na karon ang Rico’s Lechon sa pagnegusyo dinhi sa Syudad sa Sugbo, nakatilaw na kita niini og #dabestgyud kini sa mga lechon Cebu. Naa ang dakong demand alang sa ilang lechon. Pangitaan lang gyud og paagi nga maka-supply sa maong demand.