Love and hatred
Nahunong ang among pag-estorya ni Kuya Rustom dihang nahiabot si Ate Sarah gikan sa eskuwelahan. Mihunong siya ug isog ang tinan-awan kang Kuya Rustom. Unya ako na sab ang iyang gitan-aw. Iya kong gikusmoran. Unya, nagdali siyang mibiya ug misulod sa among kuwarto nga diha ra sab duol sa sala. “Sige, Lea, mopauli na ko.” Igo ko lang gitando si Kuya Rustom. Nagkadungan mig tindog. Gihatod ko siya kutob sa gawas sa gate sa among balay. Unya mibalik kog sulod sa sala. Mao say pag-abot nila ni Mama ug Papa gikan sa tagsa- ka opisina nga ilang gitrabahoan. Miamen ko nila. “Si Sarah?” Giatubang ko ni Mama. Milargo pagsulod si Papa sa ilang kuwarto. “Mao pay pag-abot, Ma.” Mibiya na si Mama nako ug misunod kang Papa. Milingkod ko sa sala. Wa na mogawas si Sarah sa among kuwarto. Usa ra ang kuwarto namo ni Ate apan tagsa mi og kama.
Miadto ko sa terrace. Gabii na niadtong tungora. Nahunahuna ko si Ate Sarah ug Kuya Rustom. Ngano ba sab, uy, nga naingon man ang ilang sitwasyon ani? Si Kuya Rustom kaluha ni Kuya Jeffrey nga boyfriend kaniadto ni Ate Sarah. Apan nagluib si Kuya Jeffrey kang Ate. Nakigrelasyon og laing girl ug gibuwagan si Ate. Gisakitan kaayo ang akong maguwang. Nagkasakit man gani siya ug naospital pa gyud.
Gikasilagan ni Ate si Kuya Jeffrey. Apan misamot kakomplikado ang sitwasyon kay nangulitawo si kuya Rustom kang Ate Sarah. Sus, kanunay balikason ni Ate si Kuya inig pamisita ani. Tulisukon pa gani. Nganlan ni Ate si Kuya Rustom og kaliwat og mga maluibon. Di kasaligan. Moduko lang intawon si Kuya Rustom. Apan gipakita ni Kuya ang dako niyang love kang Ate.
Wa siya mosurender. Nagpadayon siya sa pagpamisita kang Ate. Hangtod nga di na moatubang si Ate kang Kuya Rustom. Ug kon maatol nga naa ko sa balay, ako ang moatubang kang Kuya sa among sala. Maayo mang ikasulti si Kuya. Sa pagpaniid ko niya, buotan siya. Di parehas kang Kuya Jeffrey nga chickboy. Parehas silang duha, pulos guwapo. Aw, kaluha gud sila.
Human sa among panihapon, isog si Ate Sarah nga nakig-estorya nako sa sulod sa among kuwarto.