22ND MILO LITTLE OLYMPICS SUGDAN
Mokabat ngadto sa 7,204 ka mga atleta, opisyales ug support group ang magkatapok karong adlawa alang sa pormal nga pagsugod sa 22nd MILO Little Olympics Visayas sa Cebu City Sports Center.
Modugkat sa kalihukan mao ang usa ka parada nga sugdan sa alas 12:30 sa udto atubangan sa Abellana National High School sa Osmeña Boulevard.
Sa programa, nga sugdan sa ala 1:00 sa hapon, si MILO sports executive Lester Castillo maoy mobuhi sa welcome remarks unya mohatag og mensahe si DepEd 7 director Dr. Juliet Jeruta.
Ang badminton bronze medalist sa 2017 ASEAN School Games sa Singapore nga si Tricia Merced Opon maoy mobasa sa oath of athletes, si Ernesto Ybañez Jr. sa oath of coaches samtang si Columbus Patentes sa oath of officiating officials. Ang triple jump gold medalist sa 2017 ASEAN School Games nga si John Marvin Rafols maoy midugkat sa urna.
Mosunod ang pag-anunsyo sa mananaog isip Miss 2017 MILO Little Olympics. Ang laing MILO sports executive nga si Robbie de Vera maoy modeklarar nga abli na ang kompetisyon.
Human sa programa, ipahigayon ang gikaintapang cheerdance competition mosunod ang grand playground demonstration sa mga estudyante sa ANS dayon ang pag-anunsyo sa mga mananaog isip Biggest Delegation, Most Descipline, Loudest Cheer, Best in Saludo ug cheerdance competition. Sa press conference kagahapon sa SM Seaside Cube Wing, nagkanayon si regional organizer Ricky Ballesteros nga mas dako ug mas kulbahinam ang kompetisyon ning tuiga.
Matod ni Ballesteros nga gikan sa 132 sa miaging tuig, miburot sa 144 ka mga tunghaan ang ningsalmot sa secondary division ang mingsalmot karong tuiga.
Sa elementary division, misaka gikan sa 120 ngadto sa 125 ka mga tunghaan ang nangapil ning higayuna.
“It’s going to be a tough battle especially among Cebu teams. It’s anybody’s ball game. It’s going be an exciting competition this year,” matod ni Ballesteros, kinsa maoy respo0nsable nga midaog ang Visayas leg og best organized sulod sa tulo ka mga higayon. Gipasabot ni Ballesteros nga ang pagbalik sa powerhouse University of Cebu mao ang nakadugang sa ka kulbahinam sa mga kombati ning tuiga. Ang defending overall champion sa kompetisyon sa sedondary ug hasta sa elementary division mao ang University of San Carlos-Basic Education. Moabot ngadto sa 15 ka sporting events ang kombatihan sa kompetisyon. Kini mao ang arnis, athletics, badminton, basketball, chess, football, gymnastics, karatedo, lawn tennis, scrabble, sepak takraw, swimming, table tennis, taekwondo, ug ang volleyball. / ESL