DIAMANTE GIPASABOT SA PAYOLA?
MAYOR SA TUBURAN ANDAM MOATUBANG SA SENADO KON ‘TARA’ SA BOC SUSIHON
Andam si Tuburan Mayor Democrito “Aljun” Diamante nga moatubang kon ipatawag sa Senado kabahin sa tara list nga maoy tinubdan sa kurapsyon sa Bureau of Customs (BoC).
Namahayag niini si Diamante human usa ka Jun Diamante ang ginganlan ni Senador Panfilo Lacson nga lakip sa mga nalambigit sa tara sa BoC dinhi sa Sugbo.
Dunay mga pagduda nga mao kini si Mayor Diamante sa Tuburan, apan matod sa mayor, wa siya malambigit sa ilegal nga mga binuhatan.
Iyang giangkon nga duna siyay mga negosyo nga may koneksiyon sa Customs, sama sa trucking, cargo forwarding ug customs brokerage.
Andam nga atubangon ni Diamante ang posibleng imbestigasyon aron malimpyohan niya ang iyang ngalan.
Matod niya, wa siya mahadlok niini sanglit wa siyay ilegal nga mga kalihukan, ilabi na nianang mga naglambigit sa ilegal nga drugas ug pagpanuhol sa mga taga Customs.
“Og ipatawag ko, willing ko mo- attend para pag- clear sa akong name,” padayag ni Diamante, kinsa maoy pangulo sa League of Municipalities in the Philippines (LMP) Cebu Chapter.
Giangkon sa mayor nga duna siyay mga kaila ug higala sa Customs ug ang uban niini nasuod na niya.
Ang iyang mga suod hatagan niyag bino kun mag- birthday. Apan giklaro niya nga wa sila mangayo niini ug di kini pinugsanay.
“Wala ko nila pangayo-i. Kon pananglitan man dunay mga instances, kining dunay mga okasyon unya maayo among relasyon, that’s the time nga pwede ka. Birthday ba ron, pananglutan mohatag ka ug bino o unsay mahatag diha. But
as a friend, dili ingun nga cumpolsory nga mohatag ka nila,” niingon si Diamante.
Nagduda ang mayor nga dunay bulok-pulitika ug tumong sa paghingan sa pipila ka mga tawo mao ang pagpaka-uwaw lang kanila.
Giklaro sab ni Diamante nga way Jun sa ilang pamilya ug nga Aljun maoy iyang angga.
Sigun sa opisyal, isip usa ka negosyo nga may mga transaksiyon sa Customs, nakatampo siya sa koleksiyon sa ahensiya apan gihimug-atan niya nga di kini ilegal.
Hangtud karon, sige pa gihapon og operate ang mga negosyo ni Diamante apan giklaro niya nga gipadumala na kini niya og laing tawo sanglit nakatutok siya sa sa pagka-mayor.
Samtang nagdumili sa pagluwat og mga pamahayag si Cebu Customs District Collector Elvira Cruz, kinsa ginganlan ni Lacson.
Si Cruz kinsa gitawagan sa Superbalita Cebu kagahapon, nagdumili paghatag sa habig ug niingon nga sunod semana na siya moluwat og pamahayag daghan pa ang mogawas, apan wa niya gidetalye. “Im not ready to talk now, maybe next week,” si Cruz. Niadtong Miyerkules, atol sa iyang privilege speech ginganlan ni Lacson si kanhi Customs Commissioner Nicanor Faeldon nga maoy nangulo sa korupsyon sulod sa BOC.