8 nalanag; 1 patay

Namatay ang usa ka 54-anyos nga residente sa Barangay Liburon, dakbayan sa Carcar human nalanag sa gikaon nga isda nga Panabugan, usa ka klase sa buririring.

Siya usa sa walo ka mga tawo nga nangalanag.

Nadala pa sa Vicente Sotto Memorial Medical Center si Federito Solon human gibalhin gikan sa Carcar District Hospital apan namatay kagahapon sa alas 7:00 sa buntag.

Gikompirmar kini ni Cebu Provincial Health Officer Dr. Rene Catan sa Superbalita Cebu.

Matod usab sa konsehal sa Brgy. Liburon nga si Lucio Lastima nga nakuha ang maong isda gikan sa usa ka mananagat nga silingan ni Solon.

Dugang ni Lastima nga nag-inom sila si Solon ug kaubanan niadtong Martes sa gabii diin nakit-an nila ang mananagat ug gitanyagan sila og isda.