HULGA SA TRANSPORTASYON GITUKI
Nunot sa hulga sa seguridad sa transportasyon sa nasud, ang National Land Transportation Security Program (NLTSP) maoy nag-unang gihisgotan sa ikatulong tigom sa Provincial Peace and Order Council (PPOC) uban sa Office for Transportation Security (OTS) niadtong Miyerkules.
Ang NLTSP maoy resulta sa nagkadaiyang diskusyon ug konsultasyon tali sa Office for Transport Security ug ubang sektor sa transportasyon sa yuta.
Kini gitambungan sa mga nagkadaiyang sektor nga motambayayong sa seguridad sa natad sa transportasyon, kapulisan, Philippine Navy, ug local government units.
Apan wa lang magtuyok ang paghisgot sa mga nisalmot sa panagtigom kalabot sa transportasyon sa yuta.
Lakip sa gihisgutan sa maong panagtigum didto sa Waterfront Mactan Airport Hotel and Casino sa dakbayan sa Lapu-Lapu mao ang pag- regulate sa mga pribadong pantalan sa rehiyon tungod kay mao man kini daling masudlan sa mga dautang elemento, rebelde o terorista sanglit sayon ra man kini dungguan.
Matod ni Gerard Aquino sa OTS nga ang mga pribadong pantalan kinahanglan nga mokuha ug security compliance
sa OTS apan kon wa kini mokuha ug sertipikasyon sa maong buhatan o kuwang ang seguridad nga gipatuman niini, dinhi na mosulod ang Cebu Port Authority.
Dugang ni Aquino nga ubos sa CPA, ang mga pantalan sa rehiyon adunay gahom ang CPA nga di mohatag og permiso o ipa- cancel ang permiso sa pag- operate sa pantalan nga nagkuwang sa pagpatuman sa seguridad.
Giklaro usab ni USec. Arturo Evangelista sa OTS nga tanang pantalan sa rehiyon ubos sa CPA apan kon gawas na kini sa rehiyon, ang pagbantay niini himuon sa Philippine Port Authority.
Apan sa hisgutanan kalabot sa pribadong pantalan gawas sa rehiyon, ang lookout sa seguridad niini maoy ang mayor ug ang responsible sa pagbantay sa seguridad mao ang kapulisan.