Susihon unta

Ang isyu sa P6.4 bilyunes nga shipment sa shabu nisangko na ngadto sa pagyagyag sa dugay na kaayong bukas nga sekreto sa Bureau of Customs- ang kurapsyon nga lapad ug lawom na kaayo. Nahimo nang kabahin sa sistema ang kurapsyon sulod sa BoC. Tungod niini, pulos palpak ang nangaging mga administrasyon sa paglimpyo sa mao nga ahensya sa kagamhanan. Gikaon kadaghanan sa sistema nga dunot na kaayo.

Mao nga kataw-anan ang pangutana ni Senador Antonio Trillanes IV kang kanhi Customs commissioner Nicanor Faeldon kon duna bay kurapsyon sulod sa mao nga ahensya kay nakahibawo na siya unsay tubag.

Niadtong Miyerkules, gipresentar ni Senador Panfilo Lacson ang tara kun payola sa ahensya nga mao nay sistema sa panguwarta gikan sa gipayuhot nga mga shipment.

Sa tara, ang matag smuggled shipment, mokita og P19,000 ngadto sa P45,000 ang kurakot nga mga opisyal sa BoC. Bahinon ang kita niini sa mga opisyal ug kawani matag semana, matod ni Lacson.

Way tawo nga di motuo sa gipresentar ni Lacson tungod kay nabaniog na og maayo ang kurapsyon sulod sa mao nga buhatan. Sama usab sa Bureau of Internal Revenue (BIR).

Ang pangutana ani karon, unsa may epekto sa giyagyag ni Lacson? Makaaghat ba kaha kini og kausaban sulod sa BoC ug imbestigasyon o pagpakauwaw lang ba kadto sa mga tawo nga iyang gilambigit sa ingon nga maundang sa ilang gibuhat?

Makalusad ba kaha og imbestigasyon ang Ombudsman human ning gibutyag ni Lacson kalabot niining lapad nga kurapsyon sa mao nga ahensya?

Kadaghan na ra ba sa mga isyu nga gisusi sa Senado ug Ubos Balay Balauranan nga nalimtan ra. Way gisangkoan. Sa giingon pa, nahulog sa linaw dayong katunaw.