Love and hatred

S us, naunsa man ni si Ate Sarah, uy? Hapit na man lang kada gabii inig abot nako gikan sa eskol nga mangutana siya kon nagkita ug nagkaestorya ba mi si Kuya Rustom? Kini ang kanunay nga eksena namo sa sulod sa among kuwarto sa misunod pa nga mga adlaw. Pulos si Kuya Rustom na lang ang mogawas sa iyang baba.

“Ikaw gyud, Te, no, nagpadilipero gusto diay?”

Gusto kong lingawon si Ate Sarah usa ka gabii nga nanghigda na mi sa sulod sa mong kuwarto. Gikidhatan ko siya. Mipahiyom si Ate. Namatikdan nako nga ning pipila ka mga adlaw nga milabay, malipayon na si Ate. Di na siya init og ulo.

“Mobalik pa kaha si Rustom nako, Lea? I mean, mangulitawo pa ba kaha siyag usab nako?”

“Na, mao nay lisod tubagon, Te. Pero sa tan-aw ko kang Kuya Rustom, love gyud ka niya.”

“Pero nganong nagpalayo man siya nako?”

“Well, mao may iyang sulti nako nga duna siyay klaruhon ug sutaon sa iyang kaugalingon. Sa akong pagsabot, kon forever ba gyud ang iyang love nimo. Aw, kon mahitabo ni, sure gyud ko nga mamisita siyag usab nimo, ug pangulitawhan ka niyag usab.”

Namatikdan nako nga nindot kaayog pinahiyoman si Ate.

“Kining, Te, love sab nimo si Kuya Rustom, no, pero gipalabi mo ang kasuko nimo niya kay kaluha siya ni Kuya Jeffrey nga nagluib nimo?” Mitando si Ate Sarah. “Gusto ko lang ipabatyag kang Rustom nga nasilag gyud ko kang Jeffrey. Pero karon nga wa na magpakita si Rustom nako, nga nagpalayo na siya nako, gimingaw na ko niya. Ug nagbasol ko kon nganong wa ko siya sugta.” “Sagdi lang, Te, kay kon true love gyud ang iyang feeling nimo, balikan gyud ka niya one of these days.”

Naghilom na si Ate Sarah. Apan makita sa iyang nawong ang gibating kalipay. Gipawong ko ang suga sa among kuwarto. Parehas mi si Ate nga di makatulog kon hayag.

Usa ka gabii sa Sabado, nga ako ug ang among katabang ra sa balay, puwerte nakong lipaya kay nahiabot si Kuya Rustom. Nagdala siyag fresh

red roses ug chocolate. Aw, siyempre para gyud kini kang Ate Sarah. (TAPUSON SUNOD GULA)