Katabang nga menor

Atty Joan,

Ako si Lovie. Usa ako ka housewife ug adunay tulo ka mga anak. Tungod sa kadaghan sa akong mga trabahuon, nangita ako og katabang nga makatambayayong nako sa mga gimbuhaton sa balay.

Mahimo ba nga akong kuhaon isip katabang ang anak sa among silingan nga katorse pa lamang ang pangedaron? Lovie Dear Lovie,

Maayo na lamang ug ikaw nangutana usa pa nimo gi-kuha isip katabang ang anak sa imong silingan. Lovie, subay sa atong balaod nga RA 10361 o ang Batas Kasambahay Law, ginadili gyud ang pag-empleyo ug bata ubos sa kinse anyos (15 years old) isip katabang sa balay o kasambahay.

Kini nagpatin-aw nga dili nimo mamahimong suholan aron himuong katabang ang anak sa imong silingan nga nagpangedaron pa og katorse anyos.

Kon buot mo man gani nga mangempleyo og bata isip katabang sa balay, una, siya kinahanglan kinse anyos pataas ang edad, ikaduha, kinahanglan nga dili molapas sa walo (8) ka oras kada adlaw ug kwarenta (40) ka oras matag semana ang iyang pagpanilbi, ikatulo, dili nimo siya mamahimong patrabahuon gikan alas diyes sa gabii hangtud alas sais sa kabuntagon, ug ikaupat, ginadili nga suguon nimo siya ug mga buhat nga adunay kalambigitang risgo sa iyang kaluwasan, kabaskog ug moralidad. Daghang salamat.

Para sa inyong mga pangutana kalabot sa katungod sa mga bata ug pagproteher niini, o kung aduna kamoy ireport nga binuhatan o matang sa pang-abuso ngadto sa mga bata, mahimo kamong mo-contact sa among hotline 0908-896-0355.

Daghang salamat! Atty. Joan