MGA PULIS GIAKUSAHANG NANGAWAT

P112T, 1 KA CELL PHONE SA ILANG GI-RAID NGA ILLEGAL SWERTRES SA TALISAY

Mga pulis nga sakop sa Cebu Provincial Police Office (CPPO) gipasanginlan nga nitago sa dul-an P150,000 nga cash ug mga butang ug wa gilakip sa record sa ilang nakuhang mga ebedinsya gikan sa mga dinakpan.

Mga sakop sa Provincial Public Safety Company (PPSC) ug Provincial Anti Illegal Gambling Special Operations Task Group (PAIGSOTG) nihimog operation batok sa illegal swertres.

Ang operation gipahigayon sa sitio Isla Verde, Barangay San Isidro, dakbayan sa Talisay, pasado alas 8:00 sa gabii niadtong Huwebes sa panimay ni Cristina Pescadiro, 37.

Nakuha sa mga pulis ang 12 ka tally sheets, usa ka bundle sa stub, usa ka bundle sa stub nga ginamit, duha ka calculator, tulo ka ballpen, duha ka stapler, duha ka cell phone ug P1,850 nga gituohang halin sa ilegal nga sugal.

Lakip sa nasikop mao ang duha ka mga usher nga sila si Marina Pardillo, 48, ug Victoria Illustorio, 44.

Apan ang dinakpan natingala tungod kay sigun sa report nga gi-file sa mga pulis, P1,800 lang ang nabutang nga nakuhang kuwarta sa kapulisan agig ebedensiya.

Matod ni Pescadiro, wa malakip ang P80,000 nga gikuptan sa iyang inahan aron unta gamiton pag-opera sa iyang sakit ingon man ang tinigom sa iyang anak nga P12,000 ug laing P20,000 nga ilang tinigum.

“Buak ang alkansiya sa akong anak nga baboy. Giapil og dala nga iya intawon tong tinigum para sa iyang birthday,”matod ni Cristina.

Ngan sa mga pulis gipugngan ning mantalaan samtang wa pa makuhai sa ilang habig.

Samtang sa report usab sa kapulisan, duha lang ka cellphones ang nakuha.

Wa na malakip ang ika-tulo niyang cellphone nga mahalon nga mokantidad og dulan P25,000.

“Ako bitawng giingnan ang pulis, Sir. Miingon man sila nga kon daghan ang ibutang, mosamot kuno ka dako among pyansa. Morag naluoy pud siya na namo ba morag maoy akong tan-aw,”dugang ni Cristina.

Hinuon, ang bana ni Cristina nga niatubang sa mga tigbalita miangkon hinuon nga usher sila sa swertres.

Apan ang ilang nasakitan tungod kay bisan ang kuwarta nga way labot sa illegal, giapil sa pagkuha apan wa na sa report sa report.

“Nagpakiluoy intawn akong mama nga dili lang iapil ang kuwarta niya kay para opera intawn, gidala gyud,”matod sa bana nga nagdumili sa pagpaila.

Sa pagsuwat ning balita, padayon pang gitanggong ang mga dinakpan sa Talisay City detencion cell tungod kay wa pa sila pasakaig kaso.

Si Supt. Mario Baquiran, pangu sa PPSC, nipasalig nga iyang imbestigahon ang pasangil ni Pescadiro. /

/ ALAN TANGCAWAN ■ SUNOG. Mga lumolupyo sa Villa Zacate, Basak Pardo, dakbayan sa Sugbo nagtinabangay pagluwas mga imahen sa sulod sa ilang kapilya gikan sa nagkaduol nga sunog nga miugdaw sa kapin sa 40 ka mga balay niadtong Huwebes sa gabii. Estorya sa pahina 3.