17-ANYOS MILUGOS SA 12-ANYOS, SIKOP
Usa ka 17 anyos nga lalake ang gidakop sa kapulisan sa dakbayan sa Mandaue human gipasanginlan nga nanglugos sa usa ka 12 anyos nga babaye sa Brgy. Alangalang, dakbayan sa Mandaue niadtong Huwebes sa gabii.
Matod ni PSInsp. Mercy Villaro sa Mandaue City Police Office (MCPO) nga ang suspek ug ang biktima managhigala.
Sumala ni Villaro nga wa magtuo si Mary (tinuod ngan gipugngan), taga AC Cortes, Brgy. Alang-alang nga mabuhat ni Dan (di tinuod nga pangan), taga Barangay Mantuyong, ang panamastamas kaniya.
Pasado alas 9 sa gabii, giingong nag- text- anay ang biktima ug ang suspek nga magkita sa may dalan A.C. Cortes.
Paambit ni Villaro nga sa ilang panagkita, gibunlot ni Dan si Mary ug gidala kini atbang sa
barangay hall sa Alang-alang ug didto nahitabo ang insidente.
“Wala gyud siya (Mary) mag- expect sa kadugay nila nga kaila (ni Dan) nga mabuhat diay to niya,” matod ni Villaro ning mantalaan.
Dugang ni Villaro nga sa may ngitngit nga bahin atubangan sa barangay hall gibinarug ni Dan og panamastamas ang biktima nga nagsige og hangyo sa suspek nga di na ipadayon ang plano niini.
“Pag-abot nas ngitngit, niana kos iyaha nga “Ayaw, dili ko,” sumala pa ni Mary ngadto sa imbestigador.
Apan bisan pa man sa pagpunay og hangyo sa biktima, wa naminaw niini ang suspek.
Saysay ni Mary nga wa usab siya makasiyagit aron mangayo og tabang tungod kay wa man siyay nakit-ang tawo nga niagi sa dapit.
Giangkon sa biktima nga di na siya birhen ug wa pa kasuway og pakighilawas sa wa pa ang insidente.
Human siya panamastamasi ni Dan, nabulit sa dugo ang shorts ni Mary kinsa daling niuli bisan nagtakiang aron sa pagsumbong sa iyang ginikanan sa hitabo.
Daling nangayo og pakitabang ang biktima ug ginikanan niini sa Police Station 1 aron madakpan si Dan. Nasikop si Dan atol sa hot-pursuit operation sa Station 1 mga alas 10 sa gabii.
Saysay ni Villaro nga ang suspek gikatakdang mag-atubang og kasong pagpanglugos sa korte. /