PHO midasig sa pagtaho sa di maayong serbisyo

Duna ka bay reklamo batok sa doktor o personnel sa provincial ug district hospitals sa kagamhanan sa lalawigan sa Sugbo?

Kon duna, ipadangat kini sa Provincial Health Office (PHO) ug gipasalig sa labaw sa buhatan nga hatagan kini og pagtagad ug aksyon.

Si Dr. Rene Catan, pangu sa PHO, nibutyag nga naghimo sila og hotline nga 0919-2070001 kay direkta siya makabasa, maka- text o makatawag sa mga mensahe, inay moagi sa 8888 nga gimontar sa nasudnong kagamhanan.

Ang hotline number nakatatak mismo sa identification cards sa mga kawani sa ilang buhatan, apil ni Catan, nga ang tumong dunay kadangpan ang dunay reklamo batok sa mga doktor ug

hospital staff sa 16 ka provincial ug district hospitals sa lalawigan.

Tinguha niya nga ipapilit ang hotline number sa mga

emergency room ug ubang bahin sa tambalanan nga gipadagan sa Kapitolyo.

Ang doktor niangkon nga daghan na siya og nadawat nga reklamo sukad gisugdan og gamit ang hotline sa miaging buwan.

Matod niya, gawas nga palambuon nila ang ekipo, pacilidad sa mga district ug provincial hospital, tinguha usab nila nga mahatagan og insakto nga serbisyo ang katawhan.

“Gwapo naka og equipment, gwapo naka og facility unya pangit gihapon ang imong serbisyo, di gihapon ka. Pero kon pangit ka og facility, pangit ka og equipment pero gwapo ang imong serbisyo mahinangop ka sa mga tawo, kahibawo ka,” pamulong ni Catan.

Apan siya niangkon nga usahay makasabot siya sa mga

medical personnel nga dili makapugong sa emosyon tungod sa naghinobra nga oras sa trabaho labi na ang mga doktor nga usahay moabot na og 48 ka oras gatrabaho.

Apan iyang gipahinumduman ang iyang mga sakop nga sila ang nanginahanglan sa pasyente ug dili ang pasyente ang nanginahanglan nila.

“Usbon nato ang atong pananaw ba kon wa ang pasyente wa man tay trabaho,” dugang ni Catan.