Charter Day sa dakbayan sa Mandaue sa Agusto 30, holiday

Gideklarar sa Office of the President ang Agosto 30 isip non-working holiday sa dakbayan sa Mandaue alang sa selebrasyon sa 49th Charter Day.

Ang proklamasyon no. 296 nga nagtugot sa maong deklarasyon sa non-working holiday gipirmahan mismo sa executive secretary ni Presidente Rodrigo Duterte nga si Atty. Salvador Medialdea niadtong Huwebes.

"It is but fitting and proper that the people of the City of Mandaue, be given full opportunity to celebrate and participate in the occasion with appropriate ceremonies," matod sa proklamasyon.

Ang proklamasyon maoy tubag sa hangyo sa konseho sa dakbayan nga ideklarar nga holiday ang Agusto 30 sanglit saulogon sa Mandaue ang ilang ika-48 nga Charter day.

Sa resolusyon ni Konsehal Carmelino Del Mar, kini niingon nga makahatag og igong higayon ang proklamasyon sa matag sektor sa dakbayan nga makaselebrar sa pagkadakbayan sa Mandaue.

Sumala ni Del Mar nga sentro sa selebrasyon karong tuiga mao ang pag-ila sa mga nagkadaiyang sektor nga dako og natampo sa ekonomiya.

Nahimong dakbayan ang Mandaue niadtong Hunyo 21, 1969 ubos sa Republic Act 5519 apan ang pormal nga pag-ila sa dakbayan sa organisasyon sa gobyerno niadtong Agusto 30, 1969 ubos sa Presidential Proclamation 586 ni kanhi Presidente Ferdinand Marcos.