Injustice secretary
Daghang kilay ang miisa ug nahingangha niining pamahayag ni Department of Justice Secretary Vitaliano Aguirre II kalabot sa kamatayon sa 17-anyos nga estudyante atol sa gipahigayong "Big Time" operation didto sa Caloocan City sa niaging semana. Gustong ipalutaw ni Vitaliano nga way kalahian ang pagpatay sa mga pulis ni Delos Santos ug ang pagpatay sa mga adik ngadto sa mga menor de edad.
“Noong patayin ‘yung limang tao sa Bulacan may na-rape, may tatlong minors, bakit ni-isa walang dumalaw? Even Human Rights commissioner went to the wake of Kian yesterday,” matod ni Aguirre atol sa Senate public order committee’s hearing niadtong Huwebes nga nagtuki sa kamatayon ni Delos Santos.
Matod niya nga blown out of proportion kun gipasubraan ra ang mga reaksiyon sa pipila ka mga pundok nga nagpakabana sa pagpatay ni Kian tungod kay gisakyan kini sa mga tawo nga kontra sa administrasyon ni Presidente Duterte.
Pagka-iresponsabli ning maong pamahayag sa usa ka tawo nga unta gisaligan sa gobiyerno nga maoy mangulo sa usa ka ahensiya nga gitahasan sa pagpalutaw sa hustisya alang sa mga biktima.
Ang mga pulis o tinugyanan sa balaod ang gitahasan sa pagprotehir sa mga tawo o publiko ug pagpatunhay sa mga balaod alang sa kahusay ug kalinaw.
Buot pasabot nga ilang kontra ang mga kriminal kansang tumong ug tuyo mao ang pagbiktima sa mga inosenting tawo.
Sa kaso ni Kian, ang mga pulis maoy mipatay na hinuon sa menor de eedad sa way igong kapasikaran.
Kon mao ni magpermamente, asa ug kinsa na man diay ang kadaganan sa mga tawo aron dili maalaot sa mga kriminal?
Wa nay hustisya. Angay ning himuon si Aguirre og injustice secretary.