Garbo sa Barangay Guba
Sumad karong adlawa sa niaging semana nilanog ang makabungog nga balita labot sa pagdaug ni Mary Joy Tabal og gold medal sa Southeast Asian Games kun SEA Games sa Malaysia. Ang Sugboanong marathoner nirehistro sa labing una nga
gold alang sa Pilipinas sa nahisgutang sports competition. Nagpaka paka ang akong cellphone sa mga mensahi labot sa iyang kadaugan. Dunay nagpahinumdum nako sa mensahi nga gilitok ni Mary Joy sa mga
interview nga akong gihimo kaniya kaniadto diin naghisgut siya sa dakong tahas nga iyang sagubangon tungod ug alang sa iyang pinangga nga Sugbo. Bulawan maoy iyang target nga maoy gusto niyang ihalad bisan pa man sa daghang pagsulay nga iyang naagian. Tuod man wa makawang ang iyang paningkamot.
GUBA
Niadtong Lunes nitungas ko sa Barangay Guba sa dakbayan sa Sugbo aron himamaton ang iyang pamilya ug tagi barangay nga naglumpayat sa tumang kalipay. Ang iyang papa Rolando akong naabtan sa ilang panimalay nga kahilakon nga ni-asoy sa mga kalisdanan nga naagian sa iyang anak human gipili niini ang sport nga marathon nga mahimong kabahin sa iyang kinabuhi. Matod niya way kabutangan ang kalipay nga gibati sa nakab-ot sa iyang anak nga iyang gitawag sa angga nga Joy joy. Sa sud sa ilang panimalay nga nahimutang sa kilid sa usa ka bungtod iyang gipakita sa akong cameraman nga si Robert Abanes ang nagtipun-og nga mga medalya simbolo sa daghang kalamposan nga iyang naangkon isip usa ka atleta ug tinun-an.Ang naka nindot ni Mary Joy kay balansi ang iyang pagka tinunan kaniadto ug pagka atleta. Namuwak man sab ug daghang pasidungog ang iyang paningkamot nga makahuman og kurso. Dagan, tuon nga maoy angay nga sundon sa mga atleta karon. Sila si Claire Semblante ug Jessel Ochea nag-una sa kabataan didto sa Guba nga akong nailhan nga mga runner nga gisuportahan ni Mary Joy. Labing minos 50 sila ka buok nga gitudloan ni Mary Joy sa mga teknik unsaon pagpalambo ang dinaganay nga maoy ilang gipili. Paagi kini ni Mary Joy nga maka kita og mga runner nga mahimong mopuli sa iyang trono pag-abot sa panahon.
SELEBRASYON
Nangandam na ang kagamhanan sa dakbayan sa dakong selebrasyon nga ilang gitagana alang kang Mary Joy. Duna pay pahalipay nga salapi. Samtang sa Barangay Guba si Kapitan Orlan Herrera gustong makig-alayon sa DepEd unsaon pagpasidungog si Mary Joy atol sa iyang pagpauli. Nakasiguro ko nga alegre kini nga kalihukan kay daghan ang naghisgut didto nga makabuhong nga pagkaon ang ilang andamon. Kanimo Mary Joy daghang salamat pagbutang sa Sugbo sa mapa sa kalibutan sa marathon. Sa imong mga supporter, training staff daghang salamat sab pag-agak kang Mary Joy pagkab-ot ug kalamposan. Kon pasagdaan lang si Mary Joy kon unsay iyang buhaton agi'g pangandam sa umaabot pa nga competition. Mabuhi ang garbo sa Sugbo ug Barangay Guba.