Love and hatred

OLIVER P. FLORES (Katapusan sa pito ka mga gula)

TEEN ROMANCE

Milingkod ko sa taas nga sopa. Ug gipalingkod ko si Kuya Rustom sa atbang nga silya. Apan mitupad siya paglingkod nako. Wa ko mahimutang kay mitan-aw siyag dugay nako. Puwerte niyang seryusoha. Bisan pa man, nalipay ko sa iyang pag-abot. Ug segurado sab kong malipay si Ate Sarah aning pagbalik ni Kuya Rustom.

“Kining, Kuya, wa pa ra ba si Ate. Pero sure ko nga hapit na siya mopauli ron.”

“Di si Sarah ang akong tuyo ron, Lea. Ikaw, Lea.”

Mikusog pagbutuk-butok ang akong dughan labi na kay gitunol ni Kuya Rustom nako ang dala niyang fresh red roses ug tsokolet. Wa ko makalihok.

“U-Unsa gud ni, Kuya?” Hapit di ko makasulti.

“Nagpalayo ko ninyo ni Sarah, Lea, kay nahasol ug naglibog ko sa akong kaugalingon. Kada pamisita ko kang Sarah ikaw ang akong ikaestorya kay di man siya moatubang nako. You know, na- develop ang feeling ko nimo. Ug aron pagsuta kon love ba gyud ang gibati ko nimo, mibalhin kog eskuwela. Didto, nasuta ko sa akong kaugalingon nga

true love gyud ang gibati ko nimo, Lea.”

“Pero si Ate Sarah, Kuya?”

Kahilakon ko sa kalipay, kay sa pagkatinuod, ang gibati kong kaluoy kang Kuya Rustom napunta ngadto sa hilom kong paghigugma niya.

“Wa na koy love niya, Lea. Maybe, this is God’s will. A

blessing in disguise nga ikaw ang moatubang nako inig pamisita ko kang Sarah tungod kay ikaw ang akong destiny, ug ako sab ang imong destiny.”

Nahilom ko. Naglibog ko. Nahasol ko. Unsaon na man lang si Ate Sarah? Nahigugma na ra ba siya kang Kuya Rustom?

“Di tika dali-dalion sa pagtubag aning akong gugma nimo, Lea.”

Morag wa ko sa akong kaugalingon dihang misulod ko sa akong kuwarto paglakaw na ni Kuya Rustom. Aw, Rustom na lang diay. Di na siya magpatawag og Kuya nako. Nakadesisyon ko nga tug-anan ko si Ate Sarah sa tanan.

Pag-abot ni Ate, gisultihan ko siya bahin kang Rustom. Nakahilak si Ate. Apan wa siya masuko nako.

“Kamo gyud tingali si Rustom ang para sa usag usa, Lea.

From now on, di na ko masukog laki.”

Nagginaksanay mi si Ate. Unya, malipayon ko sa misunod nga mga adlaw kay gisugot ko si Rustom. (KATAPUSAN)