Di na kalugar

Dear Noy Kulas,

Maayong adlaw nimo. Mangayo unta ko nimo og

advice. Tawga ko sa ngan nga Henrey. Di mi kasado unya nag-abang lang mi sa usa ka boarding house. Unya naa mi kauban igsuon sa akong kapuyo. Naa mi usa ka anak nga months pa ang edad.

Akong problema sa panahon nga mag- lovemaking unta mi sa akong asawa, di na man hinuon mi makabuhat unya akong problema nahadlok ko basig makapangita na hinuon ko og laing babaye. Nahadlok pud ko basig mao ra ni ang among ka bulagan sa akong asawa. Maorag wa na may lami hinuon among pagpuyo sukad nga niipon ang iyang igsuon namo.

Iyang igsuon niipon namo mga 5 months na sa pagkakaron. Naa na siyay trabaho mga 2 months na. Unya akong gusto papangitaon na lang unta siya og boarding house, Sakto ba ning akong gibuhat, Noy Kulas? Normal ra ba ni sa usa ka magtiayon? Mangutana ko nimo kon ikaw sa akong side, unsay imong buhaton? Salamat. HENREY Henrey,

Sakto kaayo nga angay ninyo siyang pabalhinon og puyo kay naa na man siyay trabaho. Nag-abang baya sab mo. Apan ang imong asawa maoy angay mosulti ana kay iya man nang igsuon. Di maayo nga manipon ang iyang igsuon nga duna nay trabaho kay wa na moy privacy. Respeto ba ninyo nga usa na ka pamilya.

Posible na siyang masilo kon inyong papahawaon ug pabalhinon. Unya kamo ra bay mabati niana. Mao nay sagad gyud mahitabo sa mga sitwasyon nga ingon nianang inyong nasinati karon. Unsaon kadaghanan sa mga tawo gud maghuna-huna ra sa kaugalingon, di usab nila ibutang ang ilang kaugalingon sa lain. Apan kon kining tumong ninyo maayo, ayaw kahadlok. Makaayo kini niya aron makabarog na siya sa kaugalingon. Makaayo usab kini ninyo kay naa na moy privacy.

Ayaw lang ipamugos og maayo ug diha-diha aron malikayan ang away ug siloay. Hatagi lang siya og deadline. NOY KULAS

(Alang sa imong problema, e-mail sa kulassuper@sunstar.com.ph ug rojval69@ yahoo.com)