Si Filemon wala na mamasol sa dagat

LAMBERTO G. CEBALLOS Cawayan, Dalaguete, Cebu

Wala nay nahinumdom kang Filemon. Dugay na siyang gidagit sa hangin Sa kalimot nga gimugna sa paspas Nga dagan sa kausaban. Ako nahinumdom kang Filemon. Giduaw ko ang dagat nga kaniadto Adto siya mamasol og tambasakan. Apan didto wa na nako siya igkita. Ang mga tambasakan sadya Nga nanglukso sa hunasan, Wa na silay kahadlok Nga may modakop pa kanila. Misamot kadagko Ang ilang mga mata. Hain man diay si Filemon? “Ay, milalin na siya sa dakbayan,” Matod ni Juan nga namingwit og tamban. Ako siyang gipangita sa dakbayan Ug nakit-an ko siya nga nanguykoy Sa basurahan sa Inayawan. Unsay mapalit mo sa halin sa basura? “Ay, sardinas! Isda nga gisulod sa lata!”