Tepora moaway alang sa WBO interim feather

Wala man tuod madayon ang gitinguha niyang away apan usa ka dakong oportunidad ang nadawat ni World Boxing Organization (WBO) Oriental super bantamweight champion Jhack Tepora.

Si Tepora gusto untang makig-away kang ALA fighter Jeo Santisima apan dili interesado ang kampo ni Santisima.

Gumikan niini, nanikaysikay ang kampo ni Tepora alang sa laing away ug tuod man, nakakaplag kini’g maayong oportunidad.

Si Tepora gikatakdang makig-away kang South African Lusanda Komansi alang sa WBO interim featherweight title karong Septiyembre 23 sa East London South Africa.

“Since Tepora was not able to fight Santisima, he is fighting for a bigger crown and hopes to wrest the WBO featherweight title,” opisyal nga pamahayag sa promoter ni Tepora nga mao ang Omega Pro Sports International.

Si Tepora adunay impresibong 20-0, 15KOs nga rekord samtang si Komansi adunay 21-3, 18KOs nga baraha. Isip tipik sa iyang pagpangandam, si Tepora mag-training sa Baguio City kauban ang national boxing team sugod karong Agusto 28.

“He will be there for two weeks, with high-altitude and training with the Philippines’ best, he is sure to be in perfect form for the Sept. 23 title match,” dugang pamahayag sa OPSI.