22-ANYOS GIPATAY; SELOS MOTIBO
Selos maoy gitumbok nga motibo sa pagpusil patay sa usa ka batan-ong lalake sa Sitio Kalmar Barangay Lawaan 1, dakbayan sa Talisay kagahapon pasado alas 3 sa kaadlawon.
Ang namatay mao si John Ronley Calizar, 22, taga dakbayan sa Mandaue.
Samtang ang suspek giila nga si Jesie Largo, 25, taga Barangay Dumlog, dakbayan sa Talisay ug laing usa ka kauban nga wa pa mailhi sa kapulisan.
Si PO2 Cecilio Miñoza nibutyag nga si Calizar natulog lang sa usa ka lawak nga giabangan sa iyang hinigugma nga naila sa ngan nga Katherine.
Nasayran sa kapulisan nga si Largo uyab kaniadto ni Katherine.
Ang lawak nga gikatulgan ni Calizar maoy katulganan ni Largo sa dihang sila pa ang adunay relasyon.
Base sa nahipos nga kasayuran sa kapulisan nga upat na ka buwan nga nagkabuwag sila si Largo ug Katherine hangtod nga nagkaila sila ni Calizar ug nagkauyab.
Niadtong higayona didto natulog si Calizar sa maong lawak sa dihang kalit lang miabot ang gikatahapan kuyog sa lain pang lalake.
Sa dihang nanuktok ug gipangutana ni Katherine kon si kinsa kini, kalit gibuak ang bildo nga bintana dayog abli sa pultahan.
Didto gipusil sa makadaghang mga higayon tumong sa ulo ug dughan si Calizar nga maoy nakaingon sa iyang hinanaling kamatayon.
Ang kapulisan nga nirespondi sa alarma nakakuha og lima ka mga kabhang sa kalibre .45 nga pistola ug upat ka
slug ug walo ka kabhang nga gituohang iya sa 9 mm pistol sa crime scene.
Nagtuo ang kapulisan nga selos ang motibo ug wa pa makadawat si Largo sa panagbuwag sa uyab na karon sa biktima.
Apan si Katherine nanghimakak nga uyab sila ni Calizar.
Matod niya nga nagkagustohay lang sila sa biktima.
Iya kining gisultihan sa pagpauli apan nagdumili kini tungod kay giingong gipalayas siya sa iyang kapuyo.
Iyang nasayran nga si Calizar duna nay anak sa kapuyo niini.
Nakugang siya nganong gipusil sa iyang kanhi uyab si Calizar.
Samtang gisusi pa usab sa kapulisan ang report nga ilang nadawat nga si Largo nalambigit sa illegal nga drugas. /