Mga bombero naglisod tungod sa huot nga dalan sa sunog sa Basak Pardo
Dugay na nga girekomendar sa Bureau of Fire Protection nga buhatan og dalan ang Villa Zacate, Barangay Basak Pardo nga naigo sa dakung sunog niadtong Huwebes sa gabii.
Tungod sa kahagip-ot sa dapit ug way dalan nga kaagian, kapin sa 40 ka balay ang naugdaw sa miaging adlaw.
Kadaghanan sa mga dapit dinhi sa Sugbo diin nagtapok ang mga balay maoy hagit kaayo sa mga bombero nga manubag sa alarma sa sunog.
Matod ni SFO2 Pier Angelo Abellana Nga naglisud pagsulod ang ilang mga bombero duol sa nasunogan kay way klarong dalan.
Nakatabang kanila ang pagsulod sa bakante nga loti ug didto mipwesto ang mga fire
truck ug mikatkat sa mga pader ang mga bombero aron lang pagbomba sa tubig,
Gikatakda nga ilang ipatawag si Vicente Regudo ug Jerome Silaya, pulos nag-abang sa duha ka andana nga panimalay aron masuta diin magsugod ang kalayo.
Dihay aligasyon nga nakita si Silaya nga daling mibiya sa dapit dala ang iyang anak, wa pa makadako ang kalayo.
Dihay laing alegasyon nga diha makita sa giabangan ni Regudo ang kayo.
Ang panimalay nga ilang giabangan, taudtaod nang way kuryente ug naggamit lang og kandila o lamparilya.