Dili lang maghuwes de kutsilyo

Kinsa bay gusto ug abuso? Kinsa bay gusto nga yatakan ang iyang tawhanong katungod? Kinsa bay gusto nga adunay mga inosenteng tawo nga kalit lamang pamatyon sa walay igong rason? Niining kusganong kampaniya batok sa illegal nga drugas ning administrasyong Duterte daghan kaayo matod pa nga mga inosenteng tawo ang napagan. Ang maong mga tawo biktima sa extra judicial killings. Bisan kon wala sila mahilambigit sa kalihukan sa illegal nga drugas apan gipamatay.

Ang nakontrobersiyal karon mao ang kamatayon sa usa ka 17 anyos nga si Kian Lloyd Delos Santos kinsa matod pa gipatay sa mga pulis sa Caloocan City atol sa pagpangronda. Daghan ang misimpatiya sa kamatayon sa maong bantan-on kay lagi wala gyud mahilambigit sa illegal nga kalihukan sa drugas.

Gisakyan pod dayon sa mga kontra sa administrasyon, human rights groups ug mga militanteng grupo, misamot ang kontrobersiya. Adunay mga saksi nga nagkanayon nga gituyo pagpatay ang maong batan-on sa mga pulis. Samtang aduna say niingon nga armado ang maong batan-on ug misukol kini sa kapulisan nga midakop kaniya. Aduna poy mi-ingon nga wala gyud mahilambigit sa illegal nga drugas ang maong batan-on samtang aduna poy mo-ingon nga runner o drug courier kini.

Unsa man gyud ang tinuod niini? Wala kita sa maong hitabo ug wala kita makaila personal aning biktima. Ang ato lamang panawagan sa awtoridad nga imbestigahon kini og maayo ug diha na kita mohusgar kon si kinsa angay basulon o i-kondinar ning maong kaso. Kon tinuod man gani nga gituyo kini og patay sa kapulisan, dan angay nga manubag ang nakasala.

Samtang suportado nako kining kusganong kampaniya batok sa illegal drugas apan dili usab ako makatugot nga aduna na lay mga inosenteng tawo ang tuyoon sa pagpatay. Sus, kanang klaro lang kaayo diha nga nahilambigit nga dagkong mga isda, kana sila maoy angay unahon. Ato lang awhagon ang atong awtoridad nga dili lang maghuwes de kutsilyo atol sa ilang operasyon. Buot nakong ipasabot nga dili dayon mopatay kon dili kinahanglan sa situwasyon.