Rason sa sikad

Samtang nagsige kita og yawyaw sa trapiko dinhi sa Metro Cebu, duna kitay wa makit-i nga medyo positibong epekto niini. Kini mao ang grabeng aksidente nga miresulta sa grabeng pagkaangol ug kamatayon sa mga naaksidente. Sagad sa namatyan mao ang mga dapit diin kusog ang dagan sa mga sakyanan. Duna may aksidente, sagad damage to properties.

Nakaayo usab ni sa mga tag-iya og bikeshops kay tungod sa trapiko, daghan na ang naengganyo nga magbiseklita. Maayo ang negusyo. Daghan nang bikeshops karon. Kusog usab ang online business sa mga dapat ug gamit niini.

Mao lagi na, ang disadvantage ra sa bike kay sington kag abot sa opisina. Mas maayo unta lagi kon ang mga kompaniya, sama sa mga call center, mohatag usab og lugar diin makakaligo ang ilang mga kawani nga mag bike. Mao unta ni ang prebilihiyo nga ihatag sa ilang mga kawani nga kadaghanan, batan-on pa, motumaw na ang kahuyang sa panglawas tungod sa schedule sa trabaho nga nag-usab-usab. Kadaghanan mga night shift.

Pinaagi unta sa biseklita nga usa ka exercise ug pagbutang og support facilities, daghan ang ganahan mobiseklita.

Nganong mobisiklita

Dunay usa ka pagtuon nga nagpakita sa mga rason nganong ang middle age nga mga lalake, sama nako, mobiseklita.

Matod sa mantalaang Qualitative Research in Sport, Eexrcise and Health, ang pagtuon sa University of East London, dunay tulo ka mga kasinatian ang mga lalake nga magbiseklita: mastery and uncomplicated joys; may place to escape and rejuvenate ug alone but connected.

Ang mastery and uncomplicated joys may kalambigitan sa mga hagit sa pagsikad sa titip nga mga bungtod ug gilay-on sa distansya nga gisikaran.

Ang my place to escape and rejuvenate may kalambigitan sa kakusgon sa pagsikad sa hilit nga mga dapit, sama sa kabukiran nga dunay kakahuyan kun kalikupan. Magwagtang kini sa mga kabalaka samtang naa pa sa balay.

Ang alone but connected mao ang pagsikad uban sa grupo, apan way pressure sa pag-estorya ug pag-interact sa uban pang mga siklista sa social network.

Di ba maka-relate ta ani Bay Ramon, Embet, Prinz Sevilla ug uban pa? Bisan sa London ang pagtuon, apan ang rason sa mga siklista nganong sila mosikad universal kun komon bisan asa ka nga dapit sa kalibutan.

Nindot paminawon nga sa kalisod sa agianan, nalampos mo ang pagtungas ug pagdulhog. Na-enjoy ka sa green nga talan-awon nga wa sa siyudad ug pinaagi sa biseklita, milapad ang network of friends.

Ako bitaw wa ko magdahom nga makaila nako ang akong mga kauban sa biseklita karon. Sukad ko nagsikad, daghan ko og bag-ong mga higala.

Basta magkauban sa “bisyo”, magkasinabot gyud.