Someday
Puwerteng katawa ni Jerome. Apan wa ko magpadala sa iyang reaksiyon. Nag- picnic mi niadtong tungora sa sapa duol sa ilang nipa hut nga balay silbing ilang resthouse sa bukid diin nahimutang ang dako nilang kalubihan ug kamaisan. Kuyog namo ang among mga bakada sa college. Nakahigayon mi si Jerome nga magkaestorya samtang nangaon mi sa linamaw nga butong. Namutong man gud mi karon kay Domingo man.
Van nila ni Jerome ang among gisakyan aron maarang ming unom ka barkada.
“Unsa to, Jona, ma- in-love ko nimo?”
“O. Someday mao ni ang mahitabo.”
“Hayyy, Jona, nag-ilusyon ka man. Imposible nang mahitabo, uy! Anang imong katambok, makagusto ko nimo?”
Igo ko na lang gisundan sa pagtan-aw si Jerome nga mibiya nako. Miadto siya sa pundok sa among mga barkada nga puwerteng kaon sa linamaw nga butong. Ingon gyud mi aning mga barkada, manganhi sa kalubihan nila ni Jerome kon wa mi klase aron mokaon og linamaw nga butong ng gisaglan namog Bear Brand ug dinugmok nga
Rebisco crackers. Lami kaayo ning kan-on ug higupon ang sabaw.
Ambot sab ning akong lawas, uy! Tambokikoy man gani ang itawag nako sa uban kong mga barkada. Gipangutana ko sila si Mama ug Papa kon nganong tambok kaayo ko. Pinasagdan lang diay ko nila sa gamay pa kong bata sa pagkaon labi na sa mga tam-is sama sa ice cream ug uban pang mga sweets nga pagkaon. Wa ko nila limitahi sa pagkaon. Maong naingon ani ang akong lawas. Hangtod karon nga second year college na ko, dako kaayo kog kaon ug paborito ko ang mga tam-is nga pagkaon. Nadala nako ning kinaiya bisan dako na ko. Way tihik-tihik kong mokaon. Ug karon, namatngonan ko nga way maibog nakong lalaki tungod sa akong katambok. Sus, naibog ra ba kaayo ko kang Jerome, nga para nako, maoy kinaguwapohang lalaki nga akong gikaila. Nindot pa gyud siyag lawas kay kanunay na- workout. Only son pa gyud siya sa datong
parents sa siyudad. Apan ako ra kaha ang hatagan og pagtagad ni Jerome? Naay daghang guwapa ug seksi sa university nga among gitunghaan. Ug namatikdan ko nga nakigsuod siya kang
Chivey, usa sa among mga barkada ug klasmet pa gyud nako. (SUMPAYAN)