Makab-ot sab ang langit
Nakita ni Luis si Reyna nga nanaog sa mansiyon. Mikuba-kuba ang iyang dughan. Gusto na niyang isulti sa dalaga nga iya kining gihigugma. Oo, gihigugma niya si Reyna dugay na. Apan unsaon man nga dili man gyud mahitabo nga ang langit ug yuta magkaabot. Anak lang siya ni Tatay Usto nga maoy hardinero dinhi sa mansiyon. Si nanay niya Litang dugay nang mipanaw sa laing kalibutan. Nia siya sa mansiyon magpuyo uban sa iyang amahan.
Tungod sa dakong damgo ni tatay niya nga makatungha siya mihangyo kini kang Mr. Alexis, amahan ni Reyna, nga siya makatungha magabii. Miuyon ang ilang ang ilang amo. Mipasalig pa si Mr. Alexis nga kon makatiwas si Luis sa iyang pagtungha, siya mismo ang mangitag puwesto para kang Luis sa kompaniya diin si Mr. Alexis ang chairman of the board.
Nakatapos si Luis sa kursong Accountancy sa kolehiyo. Nakapasar sab siya sa CPA board exams. Ug karon usa na siya ka certified public accountant. Gituman ni Mr. Alexis ang iyang saad kang Tatay Usto ug kang Luis. Nakulokar si Luis sa auditing department sa kompaniya ni Mr. Alexis.
Apan buang gyud ang iyang kasingkasing kay nahigugma sa bugtong anak sa iyang amo, ang tawo nga mihaw-as kanila gikan sa kawad-on. Si Reyna ang gipitik niini. Apan wala mahibawo si Reyna niini kay igo ra man siya sa pagtutok sa dalaga. Dihang namatay si tatay niya Usto nananghid si Luis kang Mr. Alexis nga mobalhin na siyag puyo. Sa buhi pa ang iyang amahan diha sila puyo sa servants
quarter nga nahimutang sa luyo sa mansiyon. Apan wala mosugot si Mr. Alexis nga mobalhin si Luis.. Gusto niini nga anhi na lang siya mopuyo sa mansiyon kay may mga lawak man nga bakante. Magpili lang si Luis og usa. Tulo ra sila si Mr. Alexis ang namuyo sa mansiyon: si Mr. Alexis, si Mrs. Adelina (asawa ni Mr. Alexis), ug si Reyna. Mao nga nagpabilin siya nga nagpuyo sa mansiyon.
Karon, ning mga gutloa, iyang nakita si Reyna nga nanaog sa mansiyon. Nagsul-ob kinig puting blawos ug shorts. Mipaingon kini sa hardin. Iya kining gisundan ug didto sa usa ka sementadong lingkuranan nagtupad silag lingkod.
“Bisag patay na si Tatay Usto, M’am Rose, matag Sabado dalikyatan ko gyud pagpanghabok sa mga yuta palibot sa mga bulak, aron molambo pag- samot,” matod ni Luis.
“Wala kay plano magminyo, Luis?” ni Reyna. Wala damha ni Luis ang maong pangutana.
“Ha? Aw! Kuan!” nagkabungabunga si Luis. “Wala pa, M’am. Wa pa man na sa akong hunahuna. Magtigom pa kog kuwarta. Labot pa, wala pa sab nako ikahibalag ang babaye nga... nga...” Wala matiwas ni Luis ang iyang buot isulti kay kalit mitindog si Reyna ug mikutlog buwak sa rosas. Unya mibalik paglingkod tupad ni Luis.
“Di ba, kita ra mang edara, no, Luis?” ni Reyna nga misimhot sa gikuptan niyang bulak.
“Maguwang ko nimog usa ka tuig, M’am Reyna,” tubag ni Luis. “Ikaw, M’am, wa pa kay plano magminyo?”
Mitutok si Reyna kang Luis. Dugay. Morag dunay gihunahunang halawom uyamot. “Hmm. Parehas nimo, wala pa gyud. Aw, pangitai hinuon ko, bi!”
“Aw, oo, M’am. kon dili ka masuko. Apan kon masuko ka, mobiya ko dinhi sa inyo!”
“O, nganong mobiya ka man? Imo man kaha kong pangitaan og lalake nga buotan ug takos kong minyuan? Kuan na baya ko, Luis, hapit na ko molapas sa kalendaryo,” ni Reyna nga mipahiyom.
“M’am, tug-anan tika sa tinuod. Ako...ako dugay nang nahigugma nimo. Sorry, M’am, ha? Sayod kong ang langit dili gyud mahitabo nga mohawok sa yuta. Buanga bitaw nako, M’am! Nganong ikaw pa gyud ang gipitik sa akong kasingkasing?” ni Luis.
“Nahibawo ko, Luis, nga nahigugma ka nako. Dugay na. Nawala ang akong picture ug didto nako makit-i sa imong pitaka nga nahulog didto sa kusina,” tug-an ni Reyna nga mipadayon pagsulti, “Abi mo, nia sab nako imong picture.”
May gikuot si Reyna sa bulsa sa iyang shorts. Usa ka pitaka. Giablihan niya kini ug nakita ni Luis ang iyang hulagway nga nasuksok sa sihag nga plastik.
Mihuros ang hangin nga mipaalibwag sa mahumot nga alimyon sa mga bulak sa hardin. Mihangad si Luis sa langit. Mituaw siya sa hilom,”Makab-ot sab diay ang langit!”
(KATAPUSAN)