ASIAN GAMESANG SUNOD NGA TAHAS
Human niya naangkon ang
gold medal sa 2017 Southeast Asian Games women’s
marathon event, si Cebu Olympian Mary Joy Tabal nakatutok na alang sa sunod niyang misyon – Asian Games.
Apan sa dili pa niya sugdan ang pagpangandam sa mas lisod nga tahas, nagkanayon si Tabal nga mopahuway una siya aron mahangop ang katam-is sa iyang kalampusan sa 2017 SEAG sa Kuala Lumpur, Malaysia.
Sa usa ka victory party nga giandam sa iyang sponsor nga Motor Ace Philippines sa miaging gabii sa Ssangyong bldg. sa Gorordo Avenue, nagkanayon si Tabal nga inig balik niya sa training, dugangan pa niya ang iyang paningkamot.
“To be honest, I’m not really satisfied with my performance. It’s more on getting the gold. I have to race wisely pero wala gyud ko mokompiyansa kay anything can happen during the race,” matod sa lumad nga taga Brgy. Guba, dakbayan sa Sugbo. Alang sa kanhi sprinter sa Southwestern University, aduna pa siya maayo nga ikapakita. “I can still do better. I still have a lot to improve. I’m ready to
face the next challenge which is the Asian Games.”
Ang Asian Games ipahigayon usa ka tuig gikan karon sa Indonesia.
Nagkanayon si Motor Ace Philippines president Jonel Borromeo nga ilang ipadala og balik si Tabal sa Tuscany training
camp sa Italy apan ning higayuna, mas taas ang iyang pagpangandam nga pagabuhaton sa maong nasod. Sa Italy hugot nga nag- training si Tabal alang sa Kuala Lumpur Games. Nakuha ni Tabal ang gold medical sa 42- kilometer race sa SEAG
pinaagi sa oras nga 2:48:26. Ang iyang personal best sa full marathon kay 2:43:31.
“We are targeting nga makuha ni Joy ang below sa 2:40:00,” dugang ni Borromeo.
Matod sa dugay na'ng coach ni Tabal nga si John Philip Dueñas nga usa kinahanglang mapalambo sa 4'11” nga marathoner mao ang pagkuha sa saktong gikusgon sa dagan niini.
“One thing nga angay gyud i- improve ni Joy is her pacing,” matod ni Dueñas.
“Kinahanglan ming mo- join og international competitions not to win but as part of her training.”
Si Cebu City Mayor Tomas Osmeña, kinsa usa sa pinasidunggang mga dinapit sa kasaulogan, nagkanayon nga mohatag ang dakbayan sa Sugbo og P500,000 isip pahalipay kang Tabal sa paghatag niini og dungog dili lang sa Sugbo kon dili hasta sa tibuok nasod. / ESL