Tomas di mohatag og retirement benefit
Wa maapil sa prayoridad ni Mayor Tomas Osmeña ang paghatag og retirement benefit kon gasa ngadto sa mga barangay official kinsa ni-retire na sa pagpanerbisyo sa ilang barangay.
Si Konsehal Raymond Alvin Garcia niduso og balaudnon sa konseho nga maoy magpaluyo sa maong katuyoan apan wa pa gani kini mapalabang gibaraw na ni Osmeña.
“When we have a billion dollars a year yeah we can do that. Government officials served the people so the people come first when the people received then we can get the government official. That’s my policy,” pamahayag sa mayor.
Si Osmeña nipadayag nga prayoridad sa iyang pagdumala sa City Government mao ang paghatag og libreng edukasyon sa kabataan nga nagtungha sa mga public school nga makakuha og free education sa kolehiyo nga gisugdan sa City Hall niadtong tuig 2010.
Gusto ni Garcia nga kadtong nagserbisyo sa ilang tagsatagsa ka barangay kinsa wa nay interest nga mobalik sa pagserbisyo mahatagan og bisan nga gamay nga gasa sa siyudad isip pasalamat sa ilang natampo.
Ang konsehal sa north district nagkanayon nga makiangayon lang nga hatagan sa benepisyo ang mga retired barangay officials sanglit sa pagkahuman sa ilang panerbisyo, wa silay nadawat gikan sa gobiyerno.
Kon maaprobahan ang ordinansa, ang kanhi mga barangay kapitan makadawat og tag P5,000 matag tuig sa ilang panerbisyo ug tag P3,000 para sa mga barangay konsehal.
Ang mga kapitan o barangay konsehal nga nitaliwan na, ang ilang mga asawa, bana o mga anak ang makakobra apan way labot sa maong gratuity pay ang mga barangay official nga gi-dismissed sa Ombudsman gumikan sa ilang pagkakonbikto sa kaso.
Si Kapitan Phillip Zafra sa Barangay Tisa kinsa maoy presidente sa Association of Barangay Council nisuporta sa ordinansahon ni Garcia uban sa pagbutyag nga 24 oras nagtukaw ang mga lider sa barangay ug matag karon ug unya sila momata para pagtubag sa panginahanglan.