VSMMC adunay bag-ong mga pasilidad

Nahimo na nga modelo ang Vicente Sotto Memorial Medical Center sa medical institution sa Kabisay-an tungod sa dugang bag-ong mga pasilidad.

Niadtong Sabado, gibuksan ug gibenditahan ang bag-ong laboratory building, peri-natal complex ug ang bag-ong gi-renovate nga Out-Patient Department sa tambalanan.

Si Health Secretary Paulyn Jean Rosell-Ubial niingon nga ang pagpalambo sa pacilidad ug kagamitan sa mga tambalanan sa gobiyerno ang kabahin sa Philippine Health Agenda sa administrasyon ni Presidente Rodrigo Duterte: “All for Health towards Health for All.

Matod niya ang nag-unang tinguha sa health agenda nga matagamtaman sa katawhan ang maayong pag-atiman sa kahimsog sa lawas.

Siya niangkon nga daghang mga hagit sa mga medical center nga gidumala sa gobiyerno apan, kon magtinabangay ang tanan makab-ot ang malahutayon nga development goal.

Si Dr. Gerardo Aquino, chief of hospital sa VSMMC, niingon ang mga serbisyo nga gitanyag sa tambalanan nahisama usab sa mga serbisyo nga gitanyag sa mga pribadong ospital, apan mas ubos ang bayranan niini diin giabagan sa Philippine Health Insurance ang mga kabos.

Nitambong usab a blessing si Presidential Assitant for the Visayas Michael Lloyd Dino, Kong. Raul del Mar, Kong. Benhur Salimbangon, Department of Health (DOH) 7 director Jaime Bernadas.

Si Dr. Christopher Samson, pangu sa OPD sa VSMMC, namahayag nga gawas nga gi-renovate ang OPD, nagtanyag na usab sila og primary care services diin dunay mga clinic ang espesyalista nga mga doktor sud sa maong building.