Nagkondenar kaha?

Walay klase ug trabaho karon tungod sa atong pag-obserbar sa "Ang Araw ng mga Pambansang Bayani" subay sa mando sa Republic Act (RA) No. 3827 nga napasar isip balaud niadtong Oktubre 28, 1931. Angayan lang nga atong hinumdoman ug lab-ason kanunay ang ilang pakigbisog batok sa langyaw nga pagpanakop ug pagdaugdaog sa atong katiguwangan lakip sa pagsuyop sa bahandi sa atong dapit.

Uban sa damgo sa mga bayani sa pagtukod sa umaabot (karon) og gawasnon, dili kurakot ug malambuong nasod nga puno sa kaangayan sa dili halayo ang gintang sa kabus ug adunahan. Subay sa kasamtangang hahimtang, wala ba kaha magkondernar ang kalag sa atong mga bayani?

Daghang nasukwahi sa ilang gipakigbisogan. Pagtumaw sa halapad ug halawom nga problema sa korapsiyon sa nagdumala sa renda sa kagamhanan. Kinaiyahan naguba sa ilegal nga pagmina ug pagpamutol og mga kahoy. Kriminalidad. Paggamot sa negosyo sa ilegal nga druga ug patumaw sa daghang adik nga kadaghanan sa batan-on.

Labing inila sa mga bayani mao si Dr. Jose Rizal, ang atong nasudnong bayani. Dili ba si Rizal nag-ingon nga ang mga batan-on maoy paglaum sa nasod? Apan unsay kapalaran sa nasod kon ang daghan nang mga batan-on ang natuis ang pangutok o nangabuang tungod sa pag-abuso sa druga?

Ubang sikat nga bayani mao sila si Andres Bonifacio, Apolinario Mabini, Magat Salamat, Diego Silang, Francisco Dagohoy ug Tamblot sa Bohol, Lapu-lapu sa Sugbo, ug Rajah Soliman. Dunay uban nga wa kaayo maila nga sila si Amam Dangat sa Batanes, Datu Akadir batok sa mga Espanyol sa Lanao, Diego de la Viña sa Negros Oriental. Daghan pang wala masuwat sa kasaysayan nga parehong nakondenar?

Ug dakong hangit natong buhi sa pagputol sa kadena sa kasaypanan. Kon atong panahon na, walay pagkondenar sa kalag.