GILAS PABILING SEA GAMES KING
Giugbok pagbalik sa Gilas Pilipinas ang ilang dominasyon pinaagi sa paglampaso sa Indonesia, 94-55, aron angkunon ang gold medal sa Southeast Asian Games (SEAG) men’s basketball sa miaging gabii sa MABA Stadium sa Kuala Lumpur, Malaysia.
Ang titulo maoy ika-12 nga sunodsunod nga naangkon sa Philippine basketball sa matag duha ka mga tuig nga kompetisyon. Sa kinatibuk-an, ang Pilipinas aduna na’y 17 ka mga titulo sulod sa siya 19 ka mga edisyon sa kompetisyon.
Si Mike Tolomia, kinsa maoy katapusang nalakip sa lineup sa Gilas, nagbangis sa 2nd quarter aron dugkatan ang pagbulhot sa opensiba sa mga Pinoy.
Ang duha ka sunodsunod nga three-point shots ni Tolomia maoy nakahatag sa Gilas og 33-19 nga labaw ug gikan niadto, wala na molingi pagbalik ang mga Pinoy hangtod na sa hingpit niining kadaugan.
Gipangulohan ni Tolomia ang kadaugan pinaagi sa iyang 20 puntos, nidugang og 14 puntos si Kobe Paras samtang niamot og Raymar Jose.
“Sobrang kinakabahan ako. Sabi ko nga kay Raymar Jose, parang kinakabahan ako sa game na ‘to,” matod ni Tolomia sa interbyu sa ABS-CBN News.
“Kasi, feeling ko, hindi namin na-dominate ang SEA Games na ito. So ‘yun ang kinaka-kaba ko.”
Hinuon gipasabot ni Tolomia nga nawagtang ang iyang kulba dihang napasulod niya ang iyang unang itsa.
Sa laing bahin, si Fil-Japanese Kiyomi Watanabe milampos paglangkat sa iyang ikatulong sunodsunod nga gold medal sa judo event.
Gilupig ni Watanabe si Thai Orapin Senatham pinaagi sa oppon sulod sa 36 segundos sa ilang finals rematch.
Paingon sa finals, si Watanabe, kinsa natawo sa Sugbo, milupig nila ni Binti Niik Azman Nik Norlydiawati sa Malaysia ug Chu Myat Noe Wai sa Myanmar.
Ning pagsuwat, ang Pilipinas nakatigom na og 18 ka gold medals, 25 ka mga silver ug 50 ka mga bronze.