MCGREGOR WAY IKABUGA
Kutob ra sa 10 ka round; record ni Rocky Marcial nabuak ni Floyd Jr.
LAS VEGAS, Nevada – Human sa mahait nga sinukliay sa pulong nga milungtad og pipila ka semana, gipatak-om ni Floyd “Money” Mayweather Jr. ang baba ni Conor McGregor kagahapon pinaagi sa pagpa-undang niini sa ikanapulo nga round sa ilang away atubangan sa 14,000 ka mga misaksi sulod sa T-Mobile Arena.
Sa kadaugan, nabuak ni Mayweather (50-0) ang record ni kanhi world boxing champion Rocky Marciano nga 49-0.
Sa sayong bahin sa away, inubanan sa malanog nga abiba sa libo-an ka mga Irish ug Irish-Americans nga mipanon sulod sa Arena, gipakita ni McGregor ang iyang kaagresibo sa tinguha nga iyang matuman ang iyang saad nga kutob lang sa upat ka round iyang palukapahon si Mayweather.
Nahimong epektibo ang iyang mga jabs nga miigo sa nawong ni Mayweather apan daw sa wa kini makapatarog sa undefeated American champion kinsa igo lang mopahiyom sa tunga-tunga matag round.
Masabot nga gipauna lang ni Mayweather nga makaataki si McGregor hangtod sa ikaupat nga round apan human niini gipakita na ang iyang kahanas ug kalantip ibabaw sa ring nga mi-pressure na sa pagsugod ngadto sa two-time mixed martial arts champion.
Dinhi misugod na paghilom ang mabagang dumadapig ni McGregor ug mibuhi na og makusog nga mga kinumo si Mayweather kinsa nakamatikod nga gawas nga way igong kusog sa kumo si McGregor tara ug wala pa kini depensa.
Samtang nagpungasi ang mga kinumo ni Mayweather nga miigo sa iyang kalawasan, nagkabuang si McGregor sa pagpangita kon unsay iyang ikabawos ug ikatugbang hangtod na sa ikanapulo nga round.
Hinuon bisan pa man og maklaro ang iyang dominasyon, gihatagan gihapon ni Mayweather og pakunsuylo si McGregor.
“This was my last fight for sure, tonight was my last fight. Conor (McGregor) you’re a hell
of a champion,” matod ni Mayweather (50-0, 27KO).
Sa compubox. si Mayweather nakaigo ug 170 sa 320 niya nga gibuhian nga kinumo (53%) samtang si McGregor aduna lay 111 sa 430 niya ka kumo nga gibuhian kon 26%. /