OPISYAL ‘TINUBDAN’ SA SHABU

PANGANGKON SA PUSHER SA ERMITA NGA NAKUHAAG 1 KILO SHABU

Mekaniko nakuhaag P5 milyon nga balor sa shabu apan ang iyang bana nga mekaniko maoy nadakpan atol sa buy bust operation niadtong Lunes sa buntag sa Brgy.Ermita, dakbayan sa Sugbo.

Si Jovelyn Cristobal, minyo namaligyag sud-an sa lugar nakasibat human gi-buy bust sa PDEA-7.

Ang iyang bana nga si Norman Cristobal,48, usa ka mekaniko, nadakpan.

Gibutyag ni Norman nga ang ilang tinubdan sa shabu usa ka opisyal sa barangay.

Nakuha sa mga ahente sa PDEA 7 ang 15 ka dakong putos sa shabu nga motimbang og 1000 gramos kun usa ka kilo nga mobalor og P5 milyon.

Ang iyang asawa nga si Jovelyn maoy gika-transact sa mga agent apan nakaipsot.

Ang magtiayon maoy namaligyag drugas ug giisip nga high value target.

Si Leah Albiar, tigpamaba sa PDEA7 nga nahinabi sa Superbalita Cebu, nagkanayon nga tulo ka simana ang ilang pagpaniid sa magtiayon.

Si Albiar nagkanayon nga ang magtiayon makabaligya og duha ka kilo nga shabu matag simana.

Sumala pa niini nga mipalit ang mga ahente og 50 gramos nga shabu mobalor og P250,000.

Ang PDEA moimbestigar sa pasangil ni Cristobal nga ang tinubdan nila sa shabu mao ang usa ka opisyal sa Brgy. Ermita.

Matod ni Albiar nga nisulti si Cristobal nga usa ka opisyal nihangyong magpatabang sa pagbaligya og shabu.

Si Albiar niingon nga nimando si PDEA-Central Visayas Director Yogi Filemon Ruiz sa tanang intelligence operatives sa pagsusi sa pangangkon ni Cristobal.

Ang PDEA agents mosusi usab sa ubang mga connection ni Cristobal, nga ilang gituohan nga tigdala usab og shabu. /