MAYOR SA TOLEDO SUSPENSO SA OMBUD
Tungod sa kapakyas paghatag sa bahin sa real property tax sa usa ka barangay, gimandoan si Toledo City Mayor John Henry Osmeña nga masuspenso sud sa usa ka tuig human nakaplagan nga sad-an sa kasong grave abuse of authority.
Ang mayor gikatakda usab nga husayon sa Sandiganbayan human nakakita og basehanan ang Ombudsman nga kasohan kini og six counts sa kalapasan sa Section 3(e) sa Republic Act No. 3017 kun Anti-Graft and Corrupt Practices Act.
Si Osmeña nga nahinabi sa sibyaanang dyAB niingon nga wa pa siya masayod sa hukom.
Mohimo sila og legal nga lakang.
Ang mga kaso nagsugod human si Osmeña giingong nagdumili paghatag sa quarterly nga bahin sa RPT sa Barangay Daanglungsod, Toledo.
Ang mga record nagpakita nga ang barangay modawat unta og kinatibuk-an nga P17,733,264.80 isip bahin niini sa RPT alang sa katapusang duha ka kwarter sa 2014 ug sa 2015.
Sa iyang counter-affidavit, si Osmeña nangangkon nga dunay nag-ung-ong nga kasungian sa utlanan tali sa mga barangay Sangi ug Daanglungsod sa Court of Appeals.
Ang mayor nanalipod sa aksyon nga iyang gibuhat ug niingon nga katungdanan niini ang panalipdan ang salapi sa gobiyerno ug kabtangan.
Apan sa resolution nga giaprobahan ni Ombudsman Conchita Carpio-Morales niadtong Agusto 9, 2017, wa hatagi niini og gibug-aton ang mga depensa ni Osmeña ug namahayag nga dugay ra nahusay ang kasungian sa utlanan sa duha ka mga barangay.
Ang mga record nagpakita nga duna nay napakanaog nga desisyon ang Sangguniang Panlungsod niadtong Agusto 1, 2008 nga nahimong pinal ug executory niadtong 2011 human gibasura sa Regional Trial Court ang apelar sa Barangay Sungi.