16-ANYOS GIKA-NEGOTIATE SA MGA PULIS SA BUY BUST

Nakurat ang kapulisan sa Police Station 3 sa dakbayan sa Lapu-lapu sa dihang sawa nila damha nga ang ilang target sa buy-bust operation usa diay ka menode-edad nga maoy mihatag sa pinakete nga shabu human nga makatunol og bayad ang nagpakaaron ingnon nga buyer.

Si Ken-Ken (dili tinuod ngalan), 16-anyos, ang subject sa operasyon sa mga tinugyanan sa balaod, nasikop kauban nila ni Saint Alexander Dave Torbizo Atienza, 22 nga taga-Barangay Ibabao, dakbayan sa Mandaue ug Nico John Paul Sayson, 18, taga-Sityo Camansi, barangay Pajo, Lapu-Lapu City.

Sa gihimong operasyon niadtong Lunes sa 2:00 sa kadlawon, si Atienza maoy niduol ug nakig-negotiate niadtong potential buyer og illegal drugs. Niadtong tungora wa siyay kalibutan nga usa diay ka decoy ang poseur buyer nga ilang gikasasbot.

Human midawat si Atienza sa bayad iya gilayong giduol si Ken-Ken og misinyas nga ipagawas ang butang kay mibayad na ang buyer dayon tunol sa usa ka pakete nga adunay sud nga gituohang shabu.

Dinhi wa gilayon maglangan og panahon ang mga pulis ug daling gidakop ang duruha.

Gi-apil usab og sikop si Sayson nga nadungan og palit og shabu atol sa operasyon.

Si Ken-Ken nakuhaan og laing pito ka pakete nga adunay sud nga shabu nga maayong pagkaluklok sa pitaka sa mga sinsiyo.

Gi- turn over na karon ngadto sa Department of Social Welfare and Development (DSWD) si Ken-Ken.

Samtang anak sa Imam nga si Saiben Barbon Yahya, 36 ug Karah Mae Omolon Baguio, 25, pulos taga-barangay Pajo ang nasikop usab niadtong Biyernes sa gabii human sa laing buy-bust operation sa ilang dapit.

Mokabat sa P73,160 nga kantidad sa shabu ang nakuha gikan nila ni Yahya ug Baguio. /