Koreano gipriso kay nangulata sa iyang kapuyo

Korean national ang natanggong karon sa Talisay Detention Cell human kini mikulata sa iyang kapuyo nga Pinay kinsa naputos sa lagum ang nawong.

Ang kapuyo wala na makaagwanta tungod sa tulo ka tuig nga nagsigi og panapat kaniya ang Koreano.

Ang biktima nga si Anna (dili tinuod nga pangalan) 27 anyos, taga barangay Lagtang.

Samtang ang langyawng suspetsado giila nga si Yoon Sang, 42. Aduna silay dos anyos nga anak lalaki.

Iyang gibutyag nga nag-ipon sila niadto pang tuig 2014 samtang nagsugod ang pagpangulata kaniya niadtong 2015 sa dihang nagmabdos siya.

Matud sa biktima nga kanunay siyang dudahan sa iyang kapuyo nga langyaw nga aduna’y gibuhat nga dautan sa ilang relasyon.

Apan ang biktima hugtanon nga nibarug ug mihimakak niini.

Iyang gitug-an nga anaa lang siya pirmi sa ilang balay nga nag-atiman sa ilang anak.

Nagkaila sila niini tungod kay siya man ang kontakon kon moanhi sa Sugbo og maoy motudlo sa maong langyaw sa pinulongang eninglis.

Nagkanayon kini nga diha pay higayon nga hapit siya dunggaba ug iya kining gi-report sa kapulisan. Apan iya ra usab nga pasayluon tungod sa ilang anak.

Niadtong Domingo sa gabii wala na siya makaagwanta hinungdan nga iya na kining gipaalarma sa kapulisan human nagkadugo ang iyang ulo sa dihang giparok siya sa Koreano sa semento nila nga bungbong.

Nahadlok usab siya nga basin og manunggab kini kaniya tungod sa grabing kasuko niini.

Gisuwayan sa pagkuha ug habig ang langyaw sulod sa prisuhan apan nasuko kini.

Gani iya pang gisukmag ang rehas sa prisohan tungod sa iyang kasuko nga niabot ang mga sakop sa media.

Kagahapon si Anna nakahukom nga iya na gyud kining pasakaan og kaso ang Koreano.