Reorganize sa BOC!

Ang Bureau of Customs (BOC) maoy ahensiya sa kagamhanan nga giilang pugaran sa pangurakot. Di na kini dutlag badlong o saway kay way of life na sa taga Customs ang pangurakot.

Wa pa koy purol nga giila na kining Customs nga tuboran sa panguwarta. Hangtod natiguwang na lang ko wa gyud mausab ang nanarbaho diha kay morag diyos nila ang kuwarta. Makagaba sila kon hunahunaon.

Sila miingon nga kon gustong magdato anha lang trabaho sa Customs. Ang ako lang higala nga gihasi sa kawad-on kay daghag anak nadato pagtrabaho niya sa Customs. Gani, ordinaryo ra siyang kawani.

Nagpasalamat siya nga nakatrabaho sa Customs kay tanan niyang mga anak nakahuman sa kolehiyo. Duna siyay enhiniyero, dentista, abogado ug doktora. Tanang gasto gikan sa panguwarta sa iyang trabaho.

Di kuno siya kalikay sa panguwarta kay naghitak kini left and right. Husto siya kay ang batakan mao man: If you can't lick them, join them. Kay naa lagi ka diha, sige na lang ka diha.

Ang ako lang kadugo nga naglaroy-laroy sa pagkasud sa Customs sa Manila naingog hari ang kahimtang. Mora nag si kinsa nga don nga imong nakita, apan ang nakanindot niya nahimo siyang manggihatagon, di dawo.

Kon ako pa si Duterte akong i- reorganize ang Bureau of Customs aron back to zero ang personnel. Ilisan ang mga kawani ug pamayran. Ang di kurakot ipabilin. Apan uno ngadto sa dos porsiyento ra kini ang tarong, matod pa.

Dunay CCTV tumong sa mga bag-ong kawani ug sa ilang mga lamesa. Butangag CCTV sad ang mga transaction area sa gawas ug sa sud. Aron ang tanan transparent ug makita ang gipangbuhat sa mga empleyado

Dinhi kon di mokunhod ang panguwarta mawagtang ang pangurakot ug malimpyo ang buhatan. Mawa na ang tara ug ubang matang sa padangog aron molampos ang palusot kun smuggling.

Nagpasanginlanay karon sila si Senador Panfilo Lacson ug Commissioner Faeldon sa panguwartahay sa Customs. Gibutyag ang palusot sa anak sa senador nga nakawingig sad kaniya. Samtang si Faeldon tigdawatag tara, tug-an ni Lacson. Ilisan lagi ang tanang kawani!