Mayor ipapatay ni Duterte?
Sa akong yanong pagsabot morag duna may di maayong plano si Presidente Rodrigo Duterte kang Mayor Jade Mabilog sa siyudad sa Iloilo.
Kini human gipahibawo ni Duterte nga ang sunod assignment ni Chief Inspector Jovie Espenido, hepe sa kapulisan sa Ozamiz City ngadto na sa Iloilo.
Dihang si Espenido nahimong hepe sa kapulisan sa Albuera Leyte, napatay si Mayor Roland Espinosa.
Tungod sa kontrobersya gibalhin sa Ozamiz City si Espenido. Kay napatay naman si Mayor Parojinog, adto nasab ibalhin sa Iloilo.
Di ba murag klaro man ang pattern hilabi na sa mga gitabi sa presidente nga naay isunod human gitumba sila si Espinosa ug Parojinog? Si Mabilog, 2nd degree cousin ni Senador Franklin Drilon, gipasanginlan ni Duterte, nga protector sa mga drug lord sa Iloilo.
Kahinumdoman, ang giingong dakong drug lord sa Iloilo nga sila si Melvin Odicta, Sr. ug asawa niini nga si Meriam giambusan patay sa pag-abot sa Caticlan gikan sa Batangas sa duha ka mga armadong tawo.
Basi sa paghulagway sa mga sakop sa media nga nakaila ni Espenido, buotan, tarong ug may kahadlok sa Ginuo.
Apan lahi man ang paghulagway ni Duterte ngadto ni Espenido. Kon imong sabton usa ka pulis si Espenido nga andam mopatay og tawo nga dautan
TUBAG SA MAYOR
Gipasabot ni Daan Bantayan Mayor Vicente Loot, ang pagpabor ni Chief inspector Jovie Espenido nga pilion nga gusto madestino sa Daan Bantayan.
Kay matod ni Loot, si Espenido maoy maghatag og yawi o agianan aron malimpyuhan ang iyang pangan sa sayop nga mga pasangil sa pagprotehir sa negusyo sa ilegal nga drugas.
Gipasabot ni Loot nga nakaila kaniya ug sa iyang pagka tawo si Espenido isip kauban sa trabaho sa pagka pulis.
Ang pangan ni Loot gigamit sa usa ka pulis sa Region 8 nga nangayo P20,000 matag buwan isip protection
money sa nalambigit sa pagbaligya og ilegal nga drugas.
Kon imong sabton, klaro nga gibaligya ang pangan ni Loot sa usa ka yanong pulis. Kay ang P20,000 nga protection money para lang sa mga ultimong pulis.
Kay basi sa resulta sa imbistigasyon sa Senado, ang binuwan nga protection money sa matag heneral moabot man og P300,000 ang matag buwan.