Nayabag na pod siya

SuperBalita Cebu - - SUPER BIRADA - (bobbygnalzaro@gmail. com) Bobby Nalzaro

Ambot ug unsay nasulod sa ulo o nakaon aning "kanhi laos nga pulitiko" nga iya man putlon ang paghatag ug allowances gikan sa city government ngadto sa mga trabahante sa barangay sama sa mga barangay tanod, Lupon members, health workers ug uban pa gawas sa mga garbage loaders.

Sukad pa kaniadto naghatagan na og subsidy ang City Hall ngadto sa mga barangay workers isip dugang sa ilang gidawat nga honorarium gikan sa barangay. Mas dako nga barangay, mas dako usab ang madawat sa ilang mga barangay workers.

Ang City Government naghatagan og allowances balig P5,000 sa mga health workers, P4,000 sa mga tanod ug Lupon member. Matag barangay adunay 20 ka mga Lupon members. Dako na kini og tabang sa mga trabahante sa barangay. Hinuon, duna pa silay dawaton gikan mismo sa barangay. Apan kadtong gamay nga barangay ug gamay ra og income, aw, gamay ra usab ang mahatag.

Ang iyang rason nga iyang giputol ang allowances gumikan kay wala kunoy maayong performance ang maong mga barangay workers. Ang naka-nindot lang pod niining iyang desisyon kay iyang gikuridas.

Dili lang ang mga barangay nga gidumala sa mga Barug Team Rama barangay captains ang iyang giputlan kon dili tanan, apil na ang mga barangay nga gidumala sa iyang mga hinanib sa Bando Osmeña Pundok Kauswagan (BOPK).

Ambot ug giunsa niya sa pagkahibalo nga walay maayong performance ang mga barangay workers. Iya ba kining gisusi og maayo? O hunghung lang ang iyang nadawat.

Ang labaw nga nahibalo kabahin sa performance ning maong mga barangay workers mao mismo ang mga kapitan. Kon nakahatag ta sa ubang sektor sama sa mga senior citizens ug mga persons with disability (PWD) nganong dili man kita makahatag bisan gamay sa mga nagtrabaho sa barangay nga dako ug gikatampu. Kana lang nga barangay health workers mao kana sila ang magtuyok-tuyok sa barangay aron maoy mobakuna ug mopurga sa mga bata.

Newspapers in Tagalog

Newspapers from Philippines

© PressReader. All rights reserved.