Mga tawo ang gisulotan

Daghang maapektohan kon mahinayon nga putlon ni Cebu City Mayor Tomas Osmeña ang honorarium sa mga barangay workers sa 80 ka mga barangay. Gawas sa mga basurero, ang dili na unya makadawat og honorarium gikan sa City Government mao ang mga tanod, barangay health workers ug ang mga sakop sa Lupong Tagapamayapa.

Sa iyang press conference sa niaging adlaw, gipahibawo ni Osmeña nga ang pagkamasupilon ning mga tawhana maoy nakapaaghat kaniya nga putlon na ang ilang honorarium.

Pero iklaro ni Osmeña kon asa dapita nagmagahi ang ulo sa mga gihisgutang barangay workers ug kinsa usab ang iyang tinubdan nga nakaingon siya niini.

“Effective immediately, all the allowances of tanods are cut, all the subsidies for the barangays from the City are cut off including Lupon and BHW, among others. I’m going to exercise all my legal options,” matod ni Osmeña.

Dul-an sa 3,000 ka mga barangay workers nga nagdawatan og tag P4,000 ang buwan gikan sa siyudad ang maapektohan niini.

Ang apektado niini kadtong mga gagmayng barangay nga ang income dili makasapar sa honorarium sa mga barangay workers ug nagsalig lang sa honorarium sa siyudad.

So kinsa pa man unyay ganahan nga moserbisyo sa barangay kon wa na silay madawat ilabi na sa kabukiran nga dapit?

Giingon ni Osmeña nga dili maka-argabyar kaniya ang mga barangay kay ang paghatag og honorarium sa siyudad giboluntaryo ug wa gi-obligar.

Tinuod bitaw, apan dili ba nga isip usa ka amahan sa lungsod, imo mang responsabilidad ang pag-ayuda og sulbad sa problema sa barangay alang sa kaayohan sa imong konstituwente?

Kon kini mahinayon, daw sama ra nga ang mga inosenting mga molupyo sa dakbayan maoy imong gisilutan, Mayor.