Tigpaangkan

Dear Noy Kulas,

Please tagoa lang ko sa ngan nga Eric the Lover. Nag-edad na ko og 25 pero wa pa koy klarong uyab. Bisan di pa ko minyo pero tulo na ang babaye nga akong naapaangkan. Fling ra ang akoa pero mag-serious dayon ang mga babaye nako bisan atik atik ra akoa.

Pero bisan unsaon nako og likay nga di mahigugma og serious sa usa ka babaye, di gyud diay ni malikayan. Niabot si Sharon sa akong life sukad ko nakatrabaho. Kauban mi sa office ug pareho mi og department. Kini siya grabe ka hilumon ug di himarkada, lahi sa ubang mga babaye karon. Sagad sa balay ug office ra siya. Mas ganahan pa siyang naa sa balay magbasa og libro kay sa magsuroysuroy sama sa uban.

Mao ni ang akong ganahan niya mao nagkasuod mi og maayo. Di kaayo siya gwapa, Noy, pero naa say sex appeal. Ang akong ganahan niya kay mabilin siya og balay ug di hinuroy.

Pero ang pait lang kay kon manguyab ko niya, sugton ba kaha ko nga nakahibawo man siya sa akong background? Kon sugton ko niya, makauyon ba kaha ang iyang parents nako nga tulo na man ka babaye ang akong gipaangkan? Unsa kahay imong tan-aw aning akong problema, Noy? Please tambagi ko. ERIC Eric,

Problema na kay bisan unsaon, ang ilang perception nga ikaw palikero gyud tungod kay tulo na ka mga babaye ang imong gipaangkan. Bisan gani usa lain na ang tan-aw sa mga tawo, unsa na kaha nang imoha nga tulo. Lisod na usbon.

Suwayi og panguyab si Sharon kon mosugot ba. Basin ganahan usab siya nimo. Pero ayaw duwai ang kasingkasing niya kay basin, sama ka anang uban nga nindot kaayo sa sinugdan, apan makuha na gani mapul-an na. Kon mosugot siya, ipakita kaniya nga lahi ka sa unsay iyang gituohan ug sa mga tawo kabahin nimo. Seguraduha lang sab nga gugma nang imoha kaniya kay basin usab nasayop ka sa imong pagtuo nga gugma na but na attract ka lang niya kay lahi siya sa uban.

Sa iyang parents, kon kaaguwanta ka unya, sungasonga. Mao nay tinuod nga gugma. NOY KULAS

(Alang sa imong problema, e-mail sa kulassuper@sunstar.com.ph ug rojval69@ yahoo.com)