Natag-anang kapalaran

ISRAEL G. YBANEZ Mayupay, Quiot, Cebu City

Adlaw nga Sabado. Napuno sa dayandayan ang simbahan sa San Isidro Labrador sa barangay Luyong Baybay, sakop sa lungsod sa Bantayan. Nagsugwak na sa mga bisita ug higala nilang Titing ug Veron ang simbahan. Ang kasal nilang Titing ug Veron maoy giatngan sa ilang mga silingan dinhi sa simbahan sa San Isidro Labrador.

Silang Titing ug Veron maoy tinamod sa mga batan-on sa Sityo Toko-Toko, sakop sa barangay Luyong Baybay. Gawas sa ilang maayong mga hitsura, maayo usab ang ilang mga trabaho. Si Titing usa ka piloto sa sikat nga ‘airline’ sa Estados Unidos, samtang si Veron usa ka ‘flight attendant’ sa maong kompaniya. Mao nga hapit tanang silingan may kahinam nga mosaksi sa okasyon. Malipayon si Titing nga naghanduraw sa katumanan sa iyang pangandoy.

“Dong Titing, ayaw na lag pangambisyon nianang bayhana kay wa kay mapaabot,” tambag ni mama Vicky niya kaniadtong nagsugod pa siyag kaibog kang Veron.

“Ma, di matibuok akong kinabuhi kon wa si Veron,” matod ni Titing.

“Habog ang sumbanan sa kinabuhi anang kaliwata, Dong Titing. Si Papa Paul nimo kaniadto gibasted lang dayon sa inahan ni Veron dihang nangulitawo siya,” tugan ni Mama Vicky.

“Ang pagka basted ni Papa Paul, Ma, maoy naghatag nakog kusog sa akong pangandoy nga maangkon si Veron sa hingpit,” ni Titing.

Kauban silang Titing ug Veron gikan sa Toko-Toko Elem. School hangtod mi-gradwar sila sa Luyong Baybay National High School. Bisan nahibawo si Titing nga adunay pagtan-aw si Veron kaniya, gituman niya ang pasidaan sa iyang inahan nga di magpaduol kang Veron.

“Veron, kaanindot unta kon maangkon nato ang kalibutan,” padayag ni Titing sa katapusan nilang panag-estoryahanay human sa ilang gradwasyon sa segundariya.

“Nindot unta, Ting, pero adto na ko pa-eskuylaha ni Papa sa Manila,” ni Veron.

NALIMTAN na ang panahon. Gibugtaw ni Titing ang iyang kapalaran nga mahimong piloto. Dihang nag-alagad na si Titing sa American Air Lines ug milupad sa katapusang biyahe aron mopahuway kauban sa iyang ‘crew’ sa suki nilang hotel, dihay misangpit kaniya. Nakurat siya pagkakita niya sa misangpit kaniya.

“Captain, Sir, nalipay ko nga akoy gidestino nga ‘flight attendant’ ning katapusan natong biyahe karong adlawa aron ikahimamat ka,” ni Veron nga migakos kang Titing. “Veron, nalipay sab ko sa atong panagkita aron matuman ang akong damgo,” ni Titing nga mibawos paggakos kang Veron.

Wala na maglisod sila si Titing ug Veron sa panahon. Didto sa usa ka lawak sa hotel giugkat nila ang ilang kagahapon. Miduyog nila ang ‘air

conditoner’ aron mawala ang katugnaw.

Napakgang ang matam-is nga paghanduraw ni Titing sa nangagi dihang gipahibawo siya nga miabot na si Padre Jilo, ang uyoan niyang pari, nga maoy mokasal nila ni Veron. Di matukib sa pulong ang kalipay ni Titing kay natag-anan niya ang iyang kapalaran. Nahinumdom siya sa gisulti niya kang Mama Vicky nga ‘di matibuok ang iyang kinabuhi kon wa si Veron.’ ( KATAPUSAN)