Cojuangco moluwat na lang unta

Paita. Wa gani katunga sa ilang gipanaad ug gipanghambog nga labing minus singkuwenta ka gold medal ang mahagpat sa Pilipinas sa 29th Southeast Asian Games nga gikatakdang matapos na karong adlawa didto sa Kuala Lumpur, Malaysia.

Tiaw mo nay munasaginhawa pa gani nga makaabot og 24 ka gold medal ang atong maani sa atong delegasyon nga gilangkuban og 498 ka mga atleta. Ang katapusan natong gold gikan sa Class A division sa Pencak silat nga dili gani kaayo inila sa atong nasod, kortesiya ni Dines Dumaan.

Sa kinatibuk-an, ang Pilipinas, gawas sa 24 ka gold aduna kini 33 ka silver ug 64 ka bronze nga igo ra kaayo sa ikaunom nga puwesto sa overall standing. Naapsan na gani ta sa Vietnam (no. 3) ug Singapore (no. 4) nga kon atong balikon og lantaw ang nangagi, layo ra kaayo kining nasura sa atong ranking.

Ang host Malaysia maoy midominar sa kompetisyon, gisundan sa Thailand ug ikalima ang Indonesia.

Sa ato pa, bisan tinambanon pa og kuwenta, gilupig ta sa diskarte sa ubang nasod kon ang training maoy hisgutan.

Posibli nga nag high-tech na ang uban sa ilang training unya kita wa ta mo upgrade. Misagop gihapon ta sa kinaraan nga paagi.

Unsaon nato pag- upgrade nga gani di man magkasinabot ning atong mga sports leaders. Sa miaging duha ka SEA Games - 2015 sa Singapore ug 2013 sa Myanmar, ang Pilipinas diha gihapon sa ikaunom nga puwesto pero aduna kini 29 ka gold medal.

Sa 1999 mga SEA Games 20 ra tuod ka gold medal ang atong naangkon pero niadtong higayona aduna lang kini 233 ka gold medal nga layo ra kaayo sa 404 sa karong nga SEA Games.

Migasto ta og kapin sa P100 million unya 23 ra ka gold atong naangkon? Usa sa mabasol niini, natural, kini si Jose “Peping” Cojuangco, ang presidente sa Philippine Olympic COmmittee (POC) nga morag tuko nga mipilit ug mahadlok nga mawagtang sa iyang posisyon.

Taodtaod na ni siyang naghupot sa maong puwesto, pero naobserbahan nga wala man gihapon ni siya makapasaka sa performance sa atong mga atleta. Apan kon imong pasulti-on, nindot ug tam-is kaayong mopasalig unya paghiman-himan diay to way mahimo.

Ang issue hinuon sa korapsiyon maoy permi natong masunod nga magbansiwag sa mga mantalaan, radyo ug telebisyon. Sa tuig 2019, ang Pilipinas mao na usab ang mo- host sa SEA Games.

Kay lagi host man, mogasto na usab tag dako ang gobiyerno alang sa preparasyon niini.

Ang pagpa- reconstruct sa mga pasilidad maoy hatagan og prayoridad. Natural nga matibhangan ang atong pagtutok sa pag-akatar sa atong mga atleta.

Ug tingalig mao na siguro ni higayon nga kita ilampaso sa atong mga kaatbang dinhi mismo sa atong tugkaran. Kini dili layo nga mahitabo, unless ug dunay dinalian nga kausaban sa pagpadagan sa atong sports program. Ug kini magsugod sa pagluwat ni Cojuangco ug kaubanan diha sa ilang katungdanan. Atong tabangan ug ampo.

( junmigs0622@yahoo.com)